Qamaý merzimin shekten asyrý Konstıtýtsııaǵa qaıshy dep tanyldy — Konstıtýtsııalyq Sot
ASTANA. KAZINFORM — Konstıtýtsııalyq Sot azamattardy kúzetpen ustaý merzimderi zańda belgilengen shekten asqan jaǵdaıda jol berilmeıtinin málimdedi. Sot sondaı-aq Qylmystyq-protsestik kodekstiń keıbir baptaryn Konstıtýtsııaǵa sáıkestendirýdi mindettedi.
Konstıtýtsııalyq Sot azamattardyń bultartpaý sharalaryn qoldanýdyń negizderi men tártibin, sondaı-aq basty sot talqylaýy kezinde sottalýshyny kúzetpen ustaý merzimderin reglamentteıtin Qylmystyq-protsestik kodekstiń (QPK) 136-baby birinshi bóliginiń, 140-baby tórtinshi bóliginiń, 153-baby birinshi bóliginiń jáne 342-baby birinshi, ekinshi, úshinshi jáne tórtinshi bólikteriniń Konstıtýtsııaǵa sáıkestigin tekserý týraly ótinishterin qarady.
Azamattar adamnyń jeke basynyń bostandyǵyn kúzetpen ustaý nemese úıqamaq túrinde qaıta shekteý týraly ótinishterdi sottar qaraǵan kezde merzimderdi esepteý jónindegi qoldanystaǵy normalardyń konstıtýtsııalylyǵy máselesin kótergen.
Máselen, birinshi ótinish zańda belgilengen merzim ótkennen keıin kúzetpen ustaý merzimin uzartý jaıynda (is sotqa kelip túsken kúnnen bastap esepteletin alty aı merzimdi sot ótip ketkennen keıin uzartqan).
Ekinshi jaǵdaıda kúzetpen ustaý túrindegi bultartpaý sharasy belgilengen on eki aı merzimniń ótýine baılanysty sot sheshimimen úıqamaqqa ózgertilip, taǵaıyndalǵan bultartpaý sharasy kúzetpen ustaýǵa ózgertilýi múmkin dep belgilengen.
— Azamattar daý aıtyp otyrǵan normalardy tekserý qorytyndysy boıynsha Konstıtýtsııalyq Sot Konstıtýtsııada árkimniń jeke basynyń bostandyǵy quqyǵyna kepildik berilip, zańda kózdelgen jaǵdaılarda ǵana qamaqqa alýǵa jáne kúzetpen ustaýǵa jol beriledi, bul zańda bostandyqty osylaı shekteýdiń negizderi ǵana emes, shekti merzimderi de belgilenýge tıis degendi bildiredi dep atap ótti. Sottalýshyny kúzetpen ustaýdyń zańda kózdelgen merziminen kez kelgen artyq ustaý osy konstıtýtsııalyq quqyqty buzady jáne quqyqtyq aıqyndylyq qaǵıdatyna sáıkes kelmeıdi, — delingen habarlamada.
Konstıtýtsııalyq Sot Qylmystyq-protsestik kodekstiń 342-babynyń úshinshi bóligin «osy baptyń ekinshi bóliginde kórsetilgen merzim ótkennen keıin» degen sózder bóliginde Konstıtýtsııaǵa sáıkes kelmeıdi dep tanyp, basqa qaralǵan normalar boıynsha sottalýshyny osy Kodekste kózdelgen shekti jol beriletin merzimnen artyq merzimge on eki aı merzim ótkennen keıin qaıtadan kúzetpen ustaýǵa jol berilmeıdi dep túsindirme berdi.
Sonymen birge, Úkimetke qabyldanǵan qorytyndy sheshim jarııalanǵannan kúnnen bastap alty aıdan keshiktirmeı qylmystyq-protsestik zańnamany Konstıtýtsııalyq Sottyń osy qorytyndy sheshimdegi ustanymdaryna sáıkes keltirý usynyldy.
Aıta keteıik, bıyl 15 myń qylmystyq jazasyn óteýshige raqymshylyq jasalady.
