Kamaljan Nadyrov koronavırýsqa qarsy antıdenege qan tapsyrdy
Onyń aıtýynsha, Almatyda aýrýdyń óskeni baıqalyp tur. Sondaı-aq koronavırýstyń aýyr túrimen aýyratyn naýqastar sany da artty.
«Búgin men koronavırýstyń aýyr túrimen naýqastanǵan azamattardy emdeý úshin qoldanylatyn plazmany tapsyrdym. Ózderińiz biletindeı, men osy ınfektsııamen aýyrdym jáne meniń plazmam osy indettiń aýyr túrimen aýyratyn patsıentterdi emdeýge kómektesedi dep oılaımyn. Juqtyrǵandar úshin qoldanylatyn bul ádis tiri vaktsınanyń áserine ıe jáne kópshilikke saýyǵyp ketýlerine kómektesedi. Donor bolý – árbir adamnyń paryzy. Qazir Almatyda 2 myńnan astam adam emdelip shyqty. Men árbir aýyryp jazylǵan adamdy Covid-19 antıdenesine qan tapsyrýǵa shaqyramyn. Osylaısha, koronavırýstan emdelip jatqan kóptegen adamdarǵa, eń aldymen aýyr jaǵdaıdaǵy naýqasqa kómektesýge bolady. Protsedýra qaýipsiz ótedi. Dál qazirgi jaǵdaıda – vırýspen kúres jaǵdaıynda barlyǵymyz birigýimiz kerek. Memleket juqpaly aýrýmen kúresýde úlken kómek kórsetýde. Biz barlyq qıyndyqtardy laıyqty túrde jeńe alamyz dep senemin», – dedi Almaty qalalyq basqarma basshysy.
Qazaqstanda koronavırýspen aýyrǵandardyń antıdenelerin alý protsesi bastalǵanyn aıta ketken jón. Bul protsedýrany qalaýshylar Almaty qalasynyń Respýblıkalyq qan ortalyǵynda ótkize alady.
Respýblıkalyq qan ortalyǵynyń dırektory Dılıaver Bekırovtyń aıtýynsha, bir aı ishinde 24 adam plazma tapsyrýǵa ótinish bildirgen. Biraq tek úsheýi ǵana donor boldy, sebebi olarda COVID-19 antıdeneleriniń joǵary tıtri anyqtalǵan. Kamaljan Nadyrov barlyq belgiler boıynsha donor retinde sáıkes keldi, óıtkeni onyń aǵzasynda antıdenelerdiń joǵary tıtri anyqtaldy.
Plazmaferez (plazma daıyndaý) protsedýrasy barysynda bir donordan 600 ml plazma alady, juqtyrǵan adam úshin 200 ml jetkilikti. Plazmanyń mundaı kólemin alý donorǵa eshqandaı zııan keltirmeıdi.
Bul plazmanyń áseri passıvti ımmýndaýǵa negizdelgen, ıaǵnı daıyn antıdeneler qanǵa aýystyrylady jáne osylaısha patsıenttiń vırýstaryn beıtaraptandyrady.
Qazirgi ýaqytta dárigerler qoldanatyn barlyq preparattar – bakterııaǵa qarsy nemese qabynýǵa qarsy tek janama sıpatqa ıe ekendigin esterińizge salamyz. Sondyqtan da, emdeýdiń basqa ádisterin qoldaný qajet bolady.