Kamalıev jol boıyndaǵy qyzmet kórsetý nysandary talapqa saı emes óńirlerdi atady
«Búginde respýblıkalyq joldardyń boıynda qyzmet kórsetetin 1 738 nysan bar. Olardyń 1 093-i nemese 63 paıyzy Ulttyq standart talaptaryna saı keledi. Eń tómen kórsetkishter Mańǵystaý oblysynda - 45, Pavlodar oblysynda - 49 jáne Túrkistan oblysynda 49 paıyzdy quraıdy. Al joǵary kórsetkishter Atyraý oblysynda - 81, Qostanaı oblysynda – 75, Aqtóbe oblysynda – 74 paıyz», - dedi Berik Kamalıev Ortalyq kommýnıkatsııalar qyzmetindegi baspasóz máslıhaty barysynda.
Onyń atap ótýinshe, jol boıyndaǵy servıs nysandaryn damytý boıynsha júrgizilgen jumystardyń qorytyndysy boıynsha oblys ákimdikteri úshin reıtıng jasalady.
«Biz múddeli taraptarmen birlesip, 2025 jyly jol boıyndaǵy qyzmet kórsetetin nysandardyń 100 paıyzyn Ulttyq standart talaptaryna sáıkes keltirý josparyn aıqyndadyq. 2021 jyldyń sońyna deıin bul kórsetkishti 66 paıyzǵa jetkizý qajet», - dedi vıtse-mınıstr.
