Kamala Harrıs Vashıngtonda saılaý aldynda negizgi sózin sóıledi
ASTANA. KAZINFORM – AQSh prezıdenttigine úmitker Kamala Harrıs bir aptadan keıin ótetin saılaý qarsańynda Vashıngtonda myńdaǵan adam aldynda negizgi sóz sóıledi, dep habarlaıdy BBC.
«Qaıyrly kesh, Amerıka! – dedi ol sóziniń basynda.
«Bir aptadan keıin sizdiń ómirińizge, otbasyńyzdyń ómirine jáne biz jaqsy kóretin osy eldiń bolashaǵyna tikeleı áser etetin sheshim qabyldaýǵa múmkindigińiz bolady» - dep jalǵastyrdy ol.
Onyń aıtýynsha, aldaǵy saılaý – «eki partııa men eki túrli kandıdat arasyndaǵy tańdaý ǵana emes».
Mıtıng ótetin oryn kezdeısoq tańdalǵan joq – ol Aq úıdiń janynda ornalasqan jáne Ellıps saıabaǵy dep tanymal. 2021 jyldyń 6 qańtarynda bul jerde onyń saılaýdaǵy básekelesi respýblıkashyl Donald Tramp óziniń jaqtastary aldynda sóz sóılep, sodan keıin olardyń keıbireýleri Kapıtolııge basyp kirdi.
Harrıs Tramptyń «tórt jylǵa jýyq ýaqyt buryn dál osy turǵanyn jáne jeńilip qalǵanyn bile tura, erkin jáne ádil saılaýda halyqtyń erkin jeńý úshin Kapıtolııge qarýly tobyr jibergenin» aıtty.
Buǵan deıin AQSh prezıdenttigine kandıdat Kamala Harrıs sársenbi kúni saılaýshylarmen kezdesýde qarsylasy Donald Trampty fashıst dep sanaısyz ba degen suraqqa «ıá» dep jaýap berdi.
