Kamala Harrıs aldaǵy prezıdenttik saılaýǵa qaıta túsýi múmkin ekenin jasyrmady

ASTANA. KAZINFORM — AQSh-tyń burynǵy vıtse-prezıdenti Kamala Harrıs bolashaqta óziniń áıteýir bir kúni prezıdent bolatynyn jáne bul laýazymǵa erte me, kesh pe, áıel adamynyń keletinine kámil senedi, dep jazdy BBC.

Bul týraly ol BBC arnasyna bergen suhbatynda aıtty.

Harrıstiń aıtýynsha, onyń nemereleri kózi tirisinde mindetti túrde áıel prezıdentti kóredi. Al jýrnalıst qoıǵan «Bul áıel ózińiz bolasyz ba?» degen suraqqa Harrıs «múmkin» dep jaýap berip, eldiń eń joǵary laýazymy úshin qaıta kúresýge daıyn ekenin ashyp aıtty.

Degenmen ol buǵan qatysty ázirge naqty sheshim qabyldamaǵanyn, biraq saıasattaǵy alda júrer jolynyń josparyn túzip júrgenin atap ótti.

«Men áli aıaqtaǵan joqpyn, — dedi Harrıs. — Búkil mansabym halyqqa qyzmet etýmen baılanysty, al bul meniń qanymda bar qasıet».

Jýrnalıst Kamala Harrısten Demokratııalyq partııanyń prezıdenttikke úmitkerler tizimine kirý múmkindigi tómen ekeni týraly saýal qoıǵan kezde, ol mundaı pikirlerge mán bermeıtinin aıtty.

«Eger men saýalnamalarǵa súıenip sheshim qabyldasam, ózimniń alǵashqy da, keıingi de qyzmetimniń saılaýyna túspes edim. Odan qalsa, bul jerde de otyrmas edim», — dedi ol.

Saıasatkerler men sarapshylar Demokratııalyq partııanyń ótken jyly respýblıkashyl Donald Tramptan jeńilgenin áli de talqylap keledi. Kópshiligi burynǵy prezıdent Djo Baıdendi saılaý naýqanynan erterek shyqpaǵany úshin synǵa alyp jatyr.

Alaıda keı sarapshylardyń Kamala Harrıske de qoıar suraqtary bar. Eger ol Trampqa qarsy saıası tartysty óz betinshe júrgizse, ekonomıkalyq máseleler tóńiregindegi kózqarasyn nyqtap, naqty strategııa usyna alar ma edi, degen pikirler aıtylyp jatyr.

Aıta keteıik, Kamala Harrıs Kalıfornııa shtatynyń gýbernatory qyzmetine kandıdatýrasyn usynbaıtynyn jazǵanbyz.