Kamala Harrıs AQSh-tyń Venesýeladaǵy áskerı áreketterin synǵa aldy
ASTANA. KAZINFORM — Burynǵy vıtse-prezıdent jáne Demokratııalyq partııadan prezıdenttikke úmitker Kamala Harrıs Venesýela prezıdenti Nıkolas Madýrony dıktator dep ataǵanymen, ony qulatýǵa baǵyttalǵan AQSh áskerı áreketterin durys dep sanamaıtynyn málimdedi, dep habarlaıdy Kazinform menshikti tilshisi.
— Donald Tramptyń Venesýeladaǵy áreketteri Amerıkany qaýipsiz, myqty nemese qoljetimdi ete qoımaıdy, — dedi Kamala Harrıs X paraqshasynda.
Harrıs atap ótkendeı: «Prezıdent áskerdi qaýipke tigedi, mıllıardtaǵan dollar jumsaıdy, aımaqty destabılızatsııalaıdy jáne óz elinde eshqandaı zańdy quzyret, jospar nemese paıda usynbaıdy».
— Madýro qatygez, zańsyz dıktator bolǵanymen, bul áreketterdiń zańsyz jáne aqylǵa qonymsyz bolǵanyn ózgerte almaıdy. Rejımdi aýystyrý nemese munaı úshin júrgizilgen soǵystar kúsh kórsetý retinde kórsetilse de, olar haosqa ákeledi, al amerıkandyq otbasylar sonyń zardabyn tartady, — dep esepteıdi Kamala Harrıs.
AQSh saıasatkeriniń pikirinshe, «amerıka halqy muny qalamaıdy jáne olar jalǵan aqparat estýden sharshaǵan».
— Bul rette Másele – munaı jáne Donald Tramptyń aımaqtyq kóshbasshy rólin oınaǵysy kelýi. Amerıkaǵa basymdyqtary jumys isteıtin otbasylarǵa shyǵyndy azaıtý, zań ústemdigin qamtamasyz etý, odaqtastyqty nyǵaıtý jáne eń bastysy — amerıkan halqyna qamqorlyq jasaý bolatyn kóshbasshylar qajet, — dep jazdy Kamala Harrıs.
Senbi kúni AQSh Venesýelaǵa qarsy arnaıy operatsııa júrgizip, prezıdent Nıkolas Madýro men onyń jubaıyn Karakasta tutqyndady.
Ókinishke qaraı, AQSh-tyń Venesýelaǵa jasaǵan shabýyly saldarynan keminde 40 adam qaza tapqany belgili boldy.
Keıin AQSh prezıdenti Donald Tramp Venesýela prezıdenti men onyń jubaıy Nıý-Iorkke baǵyt alǵanyn habarlady.
Venesýela prezıdenti Nıkolas Madýro men onyń jubaıy Sılııa Floreske narkoteorrorızmge qatysý, kokaın ákelý, pýlemet jáne jarylǵysh zattardy saqtaý, sondaı-aq AQSh-qa qarsy pýlemet jáne jarylǵysh zattardy saqtaý boıynsha qylmys jasaýǵa qatysty aıyptar taǵyldy. Olar jaqyn arada sot aldynda jaýap beredi, dep habarlady AQSh bas prokýrory Pem Bondı.
3 qańtarda Donald Tramp Florıdadaǵy Mar-a-Lago rezıdentsııasynan Venesýeladaǵy operatsııa jáne eldiń bolashaǵy týraly sóılegen sózinde AQSh osy eldi ótpeli kezeń aıaqtalǵansha basqarýdy jalǵastyratynyn málimdedi.
Osydan buryn BUU Bas hatshysy Antonıo Gýterrısh sońǵy aılarda AQSh pen Venesýela arasyndaǵy qarama-qaıshylyqqa «tereń alańdaýshylyq» bildirgenin jazǵanbyz.
Sonymen qatar Venesýelanyń Joǵarǵy soty vıtse-prezıdent Delsı Rodrıgesti el prezıdentiniń mindetin atqarýǵa mindettedi.