Kamala Harrıs AQSh prezıdenttigine úmitker bolýǵa jetkilikti daýys jınady

VAShINGTON. KAZINFORM — AQSh vıtse-prezıdenti Kamala Harrıs qarasha aıynda ótetin prezıdentk saılaýǵa úmitker bolý úshin jetkilikti daýys jınaı aldy. Bul týraly keshe, 2 tamyzda Demokratııalyq partııa ulttyq komıtetiniń tóraǵasy Djeımı Harrıson málimdeme jasady, dep habarlaıdy SNN agenttigi. 

Amerıka Qurama Shtattarynyń qazirgi prezıdenti Djo Baıden Harrıstiń bul jetistigin quptady.

— Men qabyldaǵan eń jaqsy sheshimderdiń biri — Kamola Harrısti vıtse-prezıdent retinde tańdaý boldy. Ol endi bizdiń partııanyń kandıdaty bolady jáne men ony maqtan tutamyn, — dep jazdy ol Facebook paraqshasynda.

Demokratııalyq ulttyq konventsııa delegattary alǵan elektrondy bıýlletenderge tek Kamola Harrıstiń esimi engizildi.

Prezıdenttikke resmı túrde usynylýda ony qoldaý úshin keminde 1976 delegat qajet boldy.

Vırtýaldy daýys berý 5 tamyzda aıaqtalady. 19-22 tamyzda Chıkagoda Demokratııalyq partııanyń ulttyq quryltaıy ótedi.

Biraq Harrıstiń kandıdatýrasy aldyn ala maquldansa, daýys berý jaı ǵana formaldylyq bolady.

— Demokratııalyq partııadan Amerıka Qurama Shtattarynyń prezıdenttigine boljamdy úmitker bolǵanymdy maqtan etemin. Vırtýaldy daýys berý kezeńi aıaqtalǵannan keıin kelesi aptada sizdiń kandıdatýrańyzdy resmı túrde qabyldaımyn, — dedi Harrıs.

Aıta keteıik, Kamala Harrıstiń reıtıngi amerıkalyqtar arasynda kúrt artty.