Kamala Harrıs AQSh prezıdenttigine qaıta úmitker bolýǵa nıetti

ASTANA. KAZINFORM — AQSh-tyń burynǵy vıtse-prezıdenti Kamala Harrıs BBC arnasyna bergen suhbatynda el tarıhynda áıel prezıdent bolatynyna senetinin aıtty, dep jazdy BBC.

Amala Harrıstiń aıtýynsha, onyń jıenderi bolashaqta áıel adamnyń prezıdenttik qyzmetke keletinin mindetti túrde kóredi.

Suhbat barysynda jýrnalıst onyń ózi sol áıel bolýy múmkin be dep suraǵanda, ol:

— «Múmkin», — dep jaýap berip, AQSh prezıdenttigine qaıta úmitker bolý múmkindigin qarastyryp jatqanyn rastady.

Degenmen saıasatker sońǵy sheshimin áli qabyldamaǵanyn, biraq saıasattaǵy qyzmetin jalǵastyrý nıeti bar ekenin atap ótti.

— Meniń jumysym áli bitken joq. Búkil mansabym — halyqqa qyzmet etýge arnalǵan, bul meniń qanymda bar, — dedi ol.

Sondaı-aq Harrıs ózine qatysty saýalnamadaǵy tómen kórsetkishterge pikir bildirip, «eshqashan reıtıngke súıenbeımin» dedi.

— Eger men saýalnamalarǵa qarap sheshim qabyldaǵan bolsam, ózimniń alǵashqy da, ekinshi laýazymyma da saılanbas edim. Tipti, qazir osynda otyrmas edim, — dedi ol.

BBC atap ótkendeı, demokratııalyq partııa áli de ótken jyly Donald Tramptyń jeńisin túsindirýge tyrysty.

Keı sarapshylar burynǵy prezıdent Djo Baıdenniń jarystan tym kesh shyǵýyn, al basqalary Kamala Harrıstiń prezıdenttik naýqanyndaǵy álsiz strategııasy men ekonomıkalyq saıasat boıynsha naqty ustanymynyń bolmaýyn partııanyń jeńilis sebepteriniń biri dep sanaıdy.

Buǵan deıin habarlanǵandaı, Kamala Harrıs Kalıfornııa shtatynda 2026 jylǵy gýbernator saılaýyna qatyspaıtynyn málimdegen edi.