Qaljyr ózenin lastap jatyr: ShQO-da altyn qazýshylarǵa qatysty tekseris bastaldy
ÓSKEMEN. KAZINFORM — Shyǵys Qazaqstan oblysy Marqakól aýdanyndaǵy altyn qazýshylarǵa qatysty tekserý júrgizý úshin arnaıy komıssııa quryldy.
Sońǵy kúnderi áleýmettik jelide Marqakól aýdanynda túsirilgen vıdeo tarady. Onda altyn qazýshylardyń Qaljyr ózenin lastap jatqany aıtylǵan.
Ónerkásip jáne qurylys mınıstrliginiń málimetinshe, osy máselege qatysty tekserý júrgiziledi.
— Marqakól aýdanynda jer qoınaýyn paıdalanýǵa lıtsenzııasy men kelisimsharty bar 6 kompanııa jumys istep jatyr. Sonymen qatar altyn óndirýge lıtsenzııa alǵan 10 jeke qazýshy bar. Qazir ekologııa, ónerkásip mınıstrlikteri, oblys ákimdigi, Bas prokýratýra jáne basqa da múddeli memlekettik organdar qyzmetkerlerinen arnaıy komıssııa quryldy. 1 tamyzda atalǵan aýmaqqa jospardan tys tekserý bastaldy. Tabıǵatty lastaý nemese zańsyz óndirý derekteri anyqtalǵan jaǵdaıda, kináliler zańǵa sáıkes jaýapqa tartylady, — delingen aqparatta.
Eske salsaq, osyǵan deıin Qazaqstanǵa ekologııalyq qaýipti shınalar zańsyz tasymaldanǵany habarlanǵan.