«Qaljat» keden beketinde ustalǵan kóliktegi taýarlar jalǵan tranzıt bolyp tabylady - kedendik baqylaý departamentiniń bastyǵy
ALMATY. Naýryzdyń 11-i. QazAqparat /Erlik Erjanuly/ - Aqpannyń 8-i kúni jedel-izdestirý sharalary kezinde «Qaljat» keden beketinde ustalǵan kólikterde jalǵan tranzıttik taýarlar anyqtaldy.
Ony Almaty oblystyq kedendik baqylaý departamentiniń bastyǵy Qurmanbek Artyqbaev búgin Almatyda ótkizgen baspasóz máslıhatynda aıtty, dep habarlaıdy QazAqparat.
Departament bastyǵy aıtýynsha, keden beketinde jalpy KHR-dan Qyrǵyzstanǵa taýar tasymaldaýshy «Trans Standart» JShS, «Azııa Trakt» JShS, «M-nefte-Servıs» JShS kompanııalaryna tıesili 54 kólik ustalǵan. Tekseris barysynda alǵashqy kóliktiń júk bóliginen qujattarda kórsetilgen 7 túrli taýarlardan bólek, qosymsha 11 taýar túri tabyldy. Sonymen qatar, taýarlar oryn sanyna sáıkes kelmeıdi. Halyq tutynatyn taýarlar tıelgen avtokólikterdegi taýarlardyń túrleri men baǵalary da tasymaldaýshylar bergen málimetpen sáıkes kelmeıtinin kórsetti. Atalǵan avtokólikterdi tekserý búginge deıin jalǵasýda.
«Departament joǵaryda kórsetilgen avtokólikterge QHR-da eksportty kedendik rásimdeý kezinde usynylǵan kedendik deklaratsııalardy jáne taýarǵa ilespe qujattardy berý ótinishimen Úrimshi kedenine suraý salǵan bolatyn. Bul Qytaı kedenimen aradaǵy ózara qarym-qatynastyń tarıhyndaǵy osy sıpattaǵy alǵashqy qujattar bolyp otyr. Ondaǵy málimetterge qarap otyrsaq, ustalǵan avtókólikterge tıelgen taýarlar Qyrǵyzstanǵa emes, Qazaqstanǵa eksporttalǵan. Taýarlardy qabyldap alýshylar qazaqstandyq kedende usynylǵan qujattarda kórsetilgendeı Qyrǵyzstannyń emes, Qazaqstannyń azamattary bolyp shyqty. Sondaı-aq, taýar týraly málimetter de tasymaldaýshylar Qyrǵyzstanǵa tranzıtke ótinish bergen kezdegi kórsetilgen málimettermen sáıkes kelmeıdi», deıdi Qurmanbek Jýasuly. Onyń sózine qaraǵanda, bul taýar Qazaqstanǵa jalǵan qujattarmen jáne kedendik tólemder men salyqtan jaltarý maqsatynda «tranzıt» rejımin qoldaný arqyly tasymaldanýy múmkin degen kúdikti naqtylaı tústi. Mundaı áreket QR Qylmystyq Kodeksiniń 209-shy babymen ekonomıkalyq kontrabanda retinde baǵalanady. Kóliktegi taýarlar Qyrǵyzstanǵa tranzıtteledi dep kórsetilgenimen, aqıqatynda qazaqstandyq qabyldap alýshylarǵa arnalǵan jalǵan tranzıt bolyp tabylady. Kedendik tólemder men salyqtardy tóleýsiz Qyrǵyzstanǵa tasymaldanǵan bul júkter ol jaqtan zańsyz jolmen Qazaqstanǵa keri jetkiziledi.
