Qalypty jaǵdaıǵa kóshkimiz kelse, ekpe alý qajet - Saǵyntaev
ALMATY. QazAqparat- Baqytjan Saǵyntaev qaladaǵy epıdemıologııalyq jaǵdaıǵa arnalǵan onlaın brıfıngte koronavırýsqa qarsy vaktsınatsııanyń mańyzdy ekenin aıtty, dep habarlaıdy qazAqparat tilshisi.
Qala ákimi vaktsına tegin salynatynyn atap ótti. Qarajat bıýdjetten bólinedi.
«Qazir bizdiń qolymyzda reseılik «Spýtnık V» vaktsınasy bar. Densaýlyq saqtaý mınıstrliginiń málimetine súıensek, elimizge qytaılyq SinoVac vaktsınasy jetkiziledi. Byltyr jeltoqsanda qosymsha eki myńnan asa erikti QazVac otandyq vaktsınasymen egildi. Sáýirdiń sońyna deıin alty myńǵa jýyq doza ákeledi degen úmittemiz. Sol jaǵdaıda ǵana halyq qandaı vaktsına saldyratynyn tańdaı alady», - dedi Saǵyntaev.
Sondaı-aq ol turǵyndardy vaktsınaǵa qatysty túrli alyp-qashpa áńgimelerge senbeýge shaqyrdy.
«Bárimiz, kórip, bilip otyrmyz, bir jyl ótti bul aýrýdyń sheshimi joq. Qaıta-qaıta lokdaýn jasap, karantınge jaýyp jatsaq ta bul aýrý ketpeı jatyr. Biz qaýipsizdiktiń barlyǵynan óttik. Aýrýdyń taralýy birde kóterilip, birde túsip otyr. Endi brıtandyq, ońtústik shtamm shyǵyp jatyr. Munyń mýtatsııasy ary qaraı kete beredi. Kelesi jyly basqa da mýtatsııasy shyǵýy múmkin. Bul vırýs bizden eshqaıda qashyp ketpeıdi. Meniń túsinigimde ómir boıy bizben bolady. Sol sebepti budan qorǵanamyz desek bizge vaktsına kerek. Basqa sheshimin kórip otyrǵan joqpyz. Ony mamandardyń barlyǵy aıtyp otyr. Іri memleketterdiń bári tek vaktsınamen sheship jatyr. Eger burynǵy qalypty jaǵdaıǵa kóshemiz desek onda qoryqpaı, qaýesetke ermeı ekpeni qabyldaýymyz qajet»,-dedi Saǵyntaev.
