Qalypty ómirge oralý árbir azamattyń jaýapkershiligine baılanysty – sarapshy
Memleket basshysy Úkimet músheleriniń elimizdegi epıdemıologııalyq jaǵdaıdy turaqtandyrýǵa arnalǵan keńestegi esepterinen soń, qazirgi shekteý sharalarynyń oń áserin odan ári arttyrý úshin jáne kórshi elderdegi epıdemıologııalyq jaǵdaıdy eskere otyryp, elimizde karantın sharalaryn taǵy da eki aptaǵa uzartyp, kezeń-kezeńmen jeńildetý týraly sheshim qabyldady.
«Eki aıǵa sozylǵan Tótenshe jaǵdaı rejımi toqtaǵan soń, sheneýnikterdiń ózderine júktelgen mindetterdi shala oryndaýy, Densaýlyq saqtaý mınıstrligi jumysyndaǵy kemshilikter, Úkimet tarapynan baqylaýdyń álsizdigine qatysty jáne jalpy el aýmaǵynda karantındik sharalardyń durys saqtalmaýynan epıdemıologııalyq jaǵdaı nasharlap, COVID-19 ınfektsııasymen aýyrǵandar sany kúrt óskendikten elimizde karantın qaıta engizilgen bolatyn. 5 shildede engizilgen kezekti karantınde jáne Memleket basshysynyń 10 shildede bergen naqty tapsyrmalarynyń nátıjesinde eldegi epıdemıologııalyq kúrdeli jaǵdaıdy turaqtandyrýǵa múmkindik týdy», - deıdi sarapshy.
Úkimet basshysynyń málimetine sáıkes, ekinshi karantın engizilgen 5 shildeden bastap indet juqtyrýshylardyń sany 29 paıyzǵa tómendedi. Statsıonarlardaǵy emdelýshiler qatary 43 paıyzǵa, onyń ishinde, reanımatsııalyq palatalardaǵy naýqastar sany 27 paıyzǵa azaıdy. Saýyǵyp shyqqandardyń sany 63 paıyzǵa deıin ósken.
Keıbir aımaqtardaǵy jaǵdaıdyń turaqtanýyna baılanysty ýaqytsha aýrýhanalar túrindegi jeti nysan jáne jalpy sany 1070 tósek-orynnan turatyn bir juqpaly aýrýlar aýrýhanasy jabyldy, al 6 ýaqytsha aýrýhanalardaǵy tósekter 855 orynǵa azaıtyldy.
«Búgin biz jaǵdaıdyń turaqtanǵanyn, ekinshi karantındi engizý arqyly halyq arasynda ınfektsııanyń taralýyn toqtatyp, densaýlyq saqtaý júıesindegi aýyrtpalyqtyń azaıǵanyn baıqap otyrmyz. Endigi kezektegi negizgi másele – kúndelikti ómirdegi jeke karantındik sharalardy saqtaý, halyqty jáne medıtsınalyq mekemelerdi ýaqytyly dári-dármekpen qamtamasyz etý. Aldaǵy ýaqytta dári-dármek jetispeýshiliginiń aldyn alý maqsatynda aımaqtarda turaqtandyrý qorlary quryldy, onyń ishinde: Almaty qalasynda – 5 mlrd teńgege, Nur-Sultanda – 1,2 mlrd teńgege, Shymkentte – 180 mln teńgege, Aqtóbe oblysynda – 500 mln teńgege, Shyǵys Qazaqstan oblysynda – 250 mıllıon teńgege qor jasaqtaldy», - deıdi A. Arzyqulov.
Buǵan deıin Memleket basshysy elimizdiń birqatar aımaǵy men bas qalasy ákimderiniń atalǵan óńirlerdegi sanıtarlyq-epıdemıologııalyq ahýal jaıyndaǵy esebin tyńdap, jalpy jaǵdaıdyń turaqtanǵandyǵyna kóz jetkizgen edi. Prezıdent ahýaldy qatań baqylaýda ustap, atalǵan mindetke jiti mán berýdi, ásirese aýyldyq jerlerdegi jaǵdaıǵa kóńil bólýdi tapsyrdy.
«Qazaqstan halqynyń teń jartysynyń aýyldy jerlerde turatynyn eskersek, jergilikti jerlerde dıagnostıka jasaý men emdeý sharalarynyń qoljetimdiligi, dári-dármekpen qamtamasyz etý mańyzdy másele bolyp otyr. Іndetke qarsy kúres aıasynda qazir aýyldyq jerlerge de ambýlatorııalyq-medıtsınalyq kómek kórsetýge erekshe nazar aýdarylady. 1500-den astam mobıldi top jumys isteýde, bul qajettiliktiń 94% quraıdy. Sonymen birge, qajettilikke sáıkes barlyq aımaqtardy jyljymaly dıagnostıkalyq keshendermen, oblystyq aýrýhanalardy otandyq tsıfrlyq rentgen apparattarymen jabdyqtaý máselesi de sheshilip jatyr. Alaıda kúres áli de jalǵasýda. Azamattar karantınniń jeńildeýi men jaǵdaıdyń salystyrmaly túrde turaqtanýyn túpkilikti jeńis dep qabyldamaýy kerek. Oń ózgeristerge qaramastan, burynǵy qalypty ómirge qaıta oralý árbir qazaqstandyqtyń jeke ustanymyna, karantın sharalaryn saqtaýyna, árbir azamattyń jaýapkershiligine baılanysty», - dedi Almas Arzyqulov.
