Qalyń jaýǵan qar Ýkraınada poıyzdardyń qozǵalysyna kedergi keltirýde
ASTANA. Jeltoqsannyń 20-sy. QazAqparat - Ýkraınada qalyń jaýǵan qardyń saldarynan 60 poıyz keshigip jatyr, onyń 37-si- jolaýshylar poıyzy.
Bul týraly eldiń Kólik jáne baılanys mınıstrligine silteme jasap RBK agenttigi habarlaýda.
Problemalyq ýchaskelerde temirjol qozǵalystaryn qalpyna keltirý jumystaryna 10 myńǵa jýyq adam atsalysýda.
Oǵan qosa, eldiń ońtústik-shyǵysyndaǵy Odessa, Severodonetsk jáne basqa da qalalardyń áýejaılary ýaqytsha jabylyp otyr.
Qalyń jaýǵan qar birqatar kúre joldardaǵy qozǵalystardy qańtaryp tastady. Joldardy tazalaý jumystaryna 3 myńǵa jýyq tehnıka men 4,5 myńnan astam adam jumyldyrylyp otyr.
