Qalyń jaýǵan qar Bishkek-Almaty tas jolyn jaýyp tastady

150 shaqty mashına qar qursaýynda qalyp qoıdy, dep habarlady Qyrǵyzstannyń Tótenshe jaǵdaılar mınıstrliginiń baspasóz qyzmetinen.

Eki qalanyń arasyn qosatyn Qordaı asýy (Qazaqstan) arqyly ótetin jol kesheli beri jabyq. Qazaqstan jaǵy adamdardy jylytý jáne ystyq tamaqpen qamtamasyz etý úshin arnaıy oryndar uıymdastyrýda.

Qyrǵyzstannyń Tótenshe jaǵdaılar mınıstrliginiń málimetteri boıynsha, meteorologııalyq jaǵdaı qıyndap otyr. Búgin, qańtardyń 20-synda saǵat 6.00-da jeldiń jyldamdyǵy sekýndyna 15 metrdi qurady, keı kezderi jeldiń ekpini 22 metr/sekýndqa deıin jetti. Qar áli jaýyp jatyr, 2-3 metr jerdegini kórýdiń ózi muń.

Tótenshe jaǵdaılar mınıstrligi Qyrǵyzstan azamattaryna Almaty baǵytyndaǵy saparlaryn keıinge qaldyrýǵa keńes berýde. Joldar qardan tazartylǵannan keıin kólikter birtindep ótkizile bastaıdy. Qazirgi ýaqytta jol ýchaskesinde qazaqstandyq 5 arnaıy tehnıka jumys istep jatyr.