Qalyń qardan Kanadanyń Kalgarı qalasynda 171 jol apaty boldy
KALGARI. QazAqparat – Kanadanyń Kalgarı qalasyna jaýǵan qalyń qar júzdegen jol-kólik oqıǵasyna sebep boldy, dep habarlaıdy «QazAqparat» HAA CBS-ke silteme jasap.
Jergilikti polıtsııa qyzmetinen málim etkendeı, senbi kúni tańǵy 6-dan jeksenbi kúni tańǵy 10-ǵa deıingi aralyqta 171 jol apaty tirkelgen. Olardyń saldarynan 13 adam zardap shekken.
«Kalgarıde qar jaýǵan soń osyndaı apattar jıi bolady», - deıdi polıtseıler.
Apattyń eń irisi Beddington Trail jáne Deerfoot Trail kúre joldarynyń qıylysynda bolǵan. Onda 16 kólik bir-birine soqtyǵysqan.
Environment Canada-nyń deregine súıensek, qaladaǵy jaýyn-shashynnyń jalpy mólsheri 15-25 santımetrge jetýi múmkin.
Okotoks, Haı Rıver, Klersholm, Kraýnsnest Pass, Pıncher Krık, Ýoterton, Kananaskıs jáne Kenmor aýdandarynyń turǵyndaryna aýa raıyna baılanysty eskertýler jiberilgen.
Alberta provıntsııasynyń ońtústik-batys bóligin de qar basqan. Dúısenbi kúni munda qardyń qalyńdyǵy 1 metrge deıin jetýi yqtımal.
Atalǵan aýdandarǵa barmaqshy bolǵan turǵyndarǵa saparlaryn keıinge qaldyrýǵa keńes berilýde.
Kalgarı halyqaralyq áýejaıy jeksenbi kúngi reısterdiń denin toqtatty. Dúısenbide Kalgarıdiń ońtústiginde ornalasqan mektepterde, Letbrıdj ýnıversıtetinde, Kainai Board of Education mektebinde sabaq bolmaıtyny jarııalandy.
