Qalyń qar, jel, boran: Qyzylorda-Pavlodar jáne Ekaterınbýrg-Almaty joldary jabyldy
QARAǴANDY. QazAqparat - Qaraǵandy oblysynda birqatar joldar jabyldy, dep habarlaıdy QazAqparat.
13 aqpan kúni Qaraǵandy oblysynyń soltústiginde, soltústik-shyǵysynda, ortalyǵynda jáne ońtústik-shyǵysynda qalyń qar jaýyp, jel kúsheıip, boran soǵyp tur.
Osyǵan baılanysty saǵat 14:30-dan bastap respýblıkalyq mańyzy bar birqatar jol ýchaskelerinde kóliktiń barlyq túrine qozǵalys jabyldy.
Olar:
«Qyzylorda – Pavlodar» (Qaraǵandy – Pavlodar oblysynyń shekarasy);
«Ekaterınbýrg – Almaty» (Qaraǵandy – Aqmola oblysynyń shekarasy, Qaraǵandy – Aqsý-Aıýly aýyly jáne Qaraǵandy qalasynyń Soltústik-Shyǵys aınalma jolynyń ýchaskesi).
Tótenshe jaǵdaılar departamentiniń kúsh-quraldary adamdardy qutqarý úshin eki márte jolǵa shyqty.
Nátıjesinde 4 adam qutqarylyp, 2 avtokólik tazartylǵan aýmaqqa súıretilip shyǵaryldy.
