Qalmuxanbet Qasymov Almatyda atys uıymdastyrǵan adamnyń salafıttermen baılanysqanyn rastady
«Bundaı baılanys bolǵan. Ony tekserip jatyrmyz. Qazir onyń jazasyn óteý merzimine qatysty barlyq derekti tergeý bastaldy. Rýslan Kúlikbaev qańtar aıynda Almatyǵa kelgennen bergi ár qadamyn tekserip jatyrmyz»,-dedi Q.Qasymov Úkimet otyrysynan soń jýrnalısterdiń suraǵyna jaýap bere kele.
Esterińizge sala keteıik, keshe, 18 shilde kúni Almatyda oryn alǵan oqys oqıǵaǵa qatysty QR Prezıdenti Nursultan Nazarbaev Qaýipsizdik Keńesin ótkizgen bolatyn.
«Kúlekbaev Rýslan Alpysbaıuly 1990 jyly 11 maýsymda týǵan, Qyzylorda oblysynyń týmasy, bunyń aldynda Baıqońyr qalasynda turyp kelgen. Úılengen. Sońǵy kezderi Almaty oblysy Іle aýdany Yntymaq aýylynda tirshilik etken, uıaly telefon satýmen aınalysqan. 2010 jyly 27 tamyzda Shymkent qalasy Eńbekshi aýdandyq sotymen Qylmystyq kodekstiń 178 baby 2 bóligi boıynsha («Zorlyq kórsetý arqyly tonaý») sottalǵan. 2012 jyly 8 mamyrda Qyzylorda oblystyq sotymen QR QK-niń 251 baby («Atys qarýyn zańsyz satyp alý jáne saqtaý») boıynsha 2 jylǵa jáne 11 aıǵa bas bostandyǵynan aıyryldy. Kolonııada salafıtterge qosylyp ketken», - dedi Qaýipsizdik Keńesiniń otyrysynda UQK-niń basshysy V.Jumaqanov.
