Qalmuhanbet Qasymov tótenshe jaǵdaılardyń aldyn alýǵa qarajatty eseleýdi usyndy
ASTANA. QazAqparat - QR Іshki ister mınıstri Qalmuhanbet Qasymov aldyn alý sharalaryn qarjylandyrýdyń tásilin qaıta qaraýdy usyndy, dep habarlaıdy QazAqparat.
Onyń aıtýynsha, birer kún buryn QR Premer-Mınıstriniń birinshi orynbasary Asqar Mamınniń qatysýymen óńirlerdiń kóktemgi tasqynǵa daıyndyq barysy pysyqtalǵan.
«Belgili bir jumys atqarylyp jatyr, biraq aımaqtar tolyq daıyn dep aıtýǵa bolmaıdy. Birqatar problemalar bar», - dedi mınıstr.
«Jergilikti organdarda aldyn alý sharalaryn qarjylandyrýdyń tásilderin qaıta qaraý kerek. Máselen, 2010-2016 jyldar aralyǵynda jergilikti bıýdjetten tótenshe jaǵdaılardyń aldyn alýǵa 17,9 mlrd. teńge bólingen. Degenmen respýblıkalyq bıýdjetten tótenshe jaǵdaıdyń keltirgen saldarlaryn joıý úshin 30 mlrd. teńge bólinipti. Bul 1,7 ese kóp», - dedi Q.Qasymov.
Onyń ústine, mınıstrdiń habarlaýynsha, Qaraǵandy oblysynda 2010 jyldan 2015 jylǵa deıin jergilikti bıýdjetten tótenshe jaǵdaılardyń aldyn alý sharalaryna 225 mln. teńge bólingen bolsa, tek 2015 jyly tótenshe jaǵdaılardyń saldarlaryn joıýǵa Úkimet qorynan 3 mlrd. teńge jumsaldy.
Soltústik Qazaqstan oblysynda búgingi tańda tótenshe jaǵdaılar qorynda 100 mln. teńge bar. Al shuǵyl shyǵyndar úshin 223 mln. teńge qarastyrylypty. 2016 jyly bul oblysqa tasqynnyń saldarlaryn joıýǵa respýblıkalyq bıýdjetten 1,3 mlrd. teńge bólingen.
