Qalmuhanbet Qasymov kolonııalarda oryn alǵan beıbereketsizdikter jaıynda aıtty
ASTANA. QazAqparat - Qylmystyq atqarý júıesi mekemelerinde sottalýshylardy ustaý rejimi tolyqtaı tártipke keltirildi. Bul týraly búgin Májilistegi Úkimet saǵatynda QR Іshki ister mınıstri Qalmuhanbet Qasymov málim etti, dep habarlaıdy QazAqparat.
«Ózderińiz de biletindeı, 10 jyldan astam Ádilet mınıstrliginiń qaramaǵynda bolǵan qylmystyq atqarý júıesi 2011 jyldyń shildesinde bizge berildi. Sol kezeńde biz probatsııany oılaýǵa múmkinshiligimiz de bolǵan joq. Kolonııalardaǵy, tergeý ızolıatorlaryndaǵy jedel ahýal óte kúrdeli boldy. Sottalýshylardyń kolonııa qyzmetkerleriniń zańdy talaptaryna toptasyp baǵynbaýy, esirtki zattarynyń, sýyq qarýdyń erkin aınalymy, óz denelerine qasaqana jaraqat salý jáne basqa da rejimdi buzýshylyq jıi oryn alatyn. Kóptegen mekemeniń ákimshileri ózderinde tártipti qamtamasyz etýge qaýqarsyzdyq tanytty. Kolonııalarda baqylaýshylarǵa shabýyldaý faktilerine jol berilip, aýyr qylmystar jasaldy. Mańǵystaý kolonııasynan 21 sottalýshynyń qarýlanyp qashyp ketýin, Balqash kolonııasynan 16 sottalýshynyń qarýlanyp qashýǵa tyrysýyn, sońynda ózderin jaryp jibergenin eske alsaq ta jetkilikti», - dedi Q.Qasymov.
Sonymen qatar, onyń aıtýynsha, kolonııalarda qylmyskerlerdiń dinı ekstremızmmen aralasýy, sottalýshylardy ózderiniń qataryna tartýǵa tyrysýy, dinı radıkalızmdi ýaǵyzdaý syndy qaýipti tendentsııa da baıqalǵan.
«Osyǵan oraı, shuǵyl arada uıymdastyrý jáne tájirıbelik máselelerdi sheshý qajet boldy. Eń álsiz býyn baqylaý qyzmeti edi. Biz ony jańadan qaıta qurdyq desek te bolady. Atalǵan qyzmet qyzmetkerleriniń jalaqysy mardymsyz, kópshiliginiń kásibı deńgeıi tómen, basym bóligi qylmyskerlerden qorqa júrip jumys isteıtin. Sondyqtan sottalýshylardy baqylaý qyzmeti sol kezdegi ishki áskerge berildi. Qazirgi ýaqytta baqylaý qyzmeti ofıtserlermen, serjanttarmen jasaqtalyp, jalaqylary artyp, áleýmettik toptamaǵa ıe boldy», - dedi ol.
Mınıstrdiń dereginshe, barlyq derlik mekemelerdi prokýratýra qyzmetkerleriniń qatysýymen aýqymdy izdeý jumystary júrgizilgen. Nátıjesinde 13 myń kesý quraldary, 11 myń uıaly telefon, 13 myńnan astam spırttik ishimdik, 130 keli esirtki zattary, úlken mólsherde qolma-qol aqsha jáne basqa da tyıym salynǵan zattar tárkilengen.
«Osy jyldardyń ishinde 22 mekemeniń kúzet ınjenerlik-tehnıkalyq quraldary jańartylyp, kúrdeli jóndeýden ótkizildi. Olardyń qaýipsizdigin qamtamasyz etý deńgeıi kóterildi. Barlyq osynaý sharalar kesheni bas bostandyǵynan aıyrý oryndaryndaǵy jaǵdaıdy turaqtandyrýǵa múmkindik berdi. Qazirgi ýaqytta bizdiń mekemelerde sottalýshylardy ustaý rejimi tolyqtaı tártipke keltirildi dep senimmen aıta alamyz», - dedi mınıstr.
