Qalmaq eliniń jas ǵalymdary Oralǵa keldi
ORAL. QazAqparat - Batys Qazaqstan ınnovatsııalyq-tehnologııalyq ýnıversıtetinde «Adamı kapıtal - jańǵyrýdyń negizi» taqyrybynda jas ǵalymdardyń halyqaralyq HVІІІ ǵylymı konferentsııasy ótti, dep habarlaıdy QazAqparat tilshisi.
Ýnıversıtettiń ǵylymı bóliminiń basshysy, fılologııa ǵylymdarynyń doktory, professor Murat Sabyrdyń aıtýynsha, shara maqsaty - jas ǵalymdardy qazirgi tańdaǵy ǵylymı máselelerdi sheshýge jumyldyrý, shyǵarmashylyq qabiletterin shyńdap, daryndy stýdentter men magıstranttardy qoldaý.
Konferentsııada elimizde, sondaı-aq Reseıdegi joǵary oqý oryndarynda bilim alyp jatqan jastar qatysyp, óz oı-tolǵamdaryn ortaǵa saldy. Mysaly, Batys Qazaqstan ınnovatsııalyq-tehnologııalyq ýnıversıtetiniń 1-kýrs magıstranty Danagúl Baımuratova «Qazaqstan jastary - rýhanı jańǵyrý jolynda» degen taqyrypta baıandama jasasa, osy oqý ornynyń aǵa oqytýshysy, M.Akmýlla atyndaǵy Bashqurt memlekettik pedagogıka ýnıversıtetiniń 2-kýrs aspıranty Baljan Baımuhanova «Pedagog mamandardy ınnovatsııalyq tehnologııalardy qoldaný negizinde kásibı daıarlaý» týraly aıtyp berdi.
Sońǵy jyldary ǵylym men bilim salasynda M.Ótemisov atyndaǵy Batys Qazaqstan memlekettik ýnıversıteti men B.Gorodovıkov atyndaǵy Qalmaq memlekettik ýnıversıteti tıimdi qarym-qatynas jasap keledi. Biraz buryn Qalmaq eliniń joǵary oqý orny Batys Qazaqstan ınnovatsııalyq-tehnologııalyq ýnıversıtetimen de osyndaı kelisimge keldi.
«Atalmysh úsh JOO arasynda birlesken jobalar júzege asatyn bolady. Aıtalyq, osy ýnıversıtetter ǵalymdary jastardy túrki til ǵylymyn zertteýge tartatyn jobalar ázirleýde. Sol sekildi batysqazaqstandyq jastar bizdiń ýnıversıtette bilim alsa, bul eki jaqqa da tıimdi bolmaq», -dedi Qalmaq memlekettik ýnıversıtetiniń oqytýshysy Vladımır Mýshaev.
Mundaı tıimdi baılanystar basqa JOO-larmen de ornatylýda.
Eki kúnge sozylǵan konferentsııa tehnıkalyq, jaratylystaný, ekonomıkalyq, áleýmettik-gýmanıtarlyq, munaı-gaz, aqparattyq, pedagogıkalyq baǵytta 14 sektsııa boıynsha jumys jasady. Oǵan 300-deı baıandama usynyldy. Konferentsııa qorytyndysy boıynsha materıaldar jınaǵy basylyp shyqpaq.
