Qallekıdiń kezekti maýsymy Abaı qoıylymymen ashylady
NUR-SULTAN. QazAqparat – 9 qazanda Q.Qýanyshbaev atyndaǵy Qazaq memlekettik akademııalyq mýzykalyq drama teatrynyń XXIX jańa teatr maýsymy ashylady, dep habarlaıdy QazAqparat teatrdyń baspasóz qyzmetine silteme jasap.
Teatrdyń jańa maýsymy qalyptasqan dástúr boıynsha Muhtar Áýezovtiń «Abaı» spektaklimen ashylady.
«Bıyl onynshy jyl teatr maýsymy «Abaı» qoıylymymen ashylady. Spektakldiń premerasy 2009 jyly shilde aıynda ótti. Sebebi teatr óneriniń korıfeıi Qalıbek Qýanyshbaev somdaǵan shoqtyǵy bıik ról – Abaı bolatyn. Qallekı somdaǵan Abaı obrazyn týyndy avtory, zańǵar jazýshy Muhtar Áýezovtiń ózi joǵary baǵalaǵan. Sondyqtan, qoıylymdy sahnalaý atalǵan óner ujymyna úlken jaýapkershilik júkteıdi», - delingen baspasóz qyzmetiniń resmı habarlamasynda.
Spektakldiń qoıýshy rejısseri – Qazaqstannyń eńbek sińirgen qaıratkeri – Álimbek Orazbekov. Onda kórermender qos Abaıdyń beınesin kóre alady. Aǵa Abaı beınesin – Qazaqstannyń halyq ártisi Tilektes Meıramov, Abaıdy – Qazaqstannyń eńbek sińirgen qaıratkeri Nurken Óteýilov somdaıdy.
9 qazannan bastap, Q. Qýanyshbaev teatry kúndelikti 19.00-de kórermenderdi repertýardaǵy spektakldermen jáne jańa premeralarmen qýantady.
