Qallekı teatrynyń jańa maýsymy dástúr boıynsha «Abaı» qoıylymymen ashylady
«Qallekı teatrynyń ár jańa maýsymy «Abaı» qoıylymymen ashylady. Bul dástúrge bıyl 13 jyl. Oǵan birden-bir sebep, óner ujymy esimin enshilegen teatr óneriniń korıfeıi Qalıbek Qýanyshbaev somdaǵan shoqtyǵy bıik ról – dál osy Abaı róli. Zamandastary Qallekı atap ketken áıgili ártistiń osy rólin týyndy avtory, jazýshy Muhtar Áýezovtiń ózi joǵary baǵalaǵan. Sondyqtan, qoıylymdy sahnalaý qallekılikterge zor jaýapkershilik júkteıdi», - delingen baspasóz málimdemesinde.
Qazaqstannyń eńbek sińirgen qaıratkeri, rejısser Álimbek Orazbekov sahnalaǵan «Abaı» tragedııasynda qos Abaıdyń beınesi kórsetiledi. Aǵa Abaı beınesin – Qazaqstannyń Halyq artısi Tilektes Meıramov, Abaı rólin – Qazaqstannyń eńbek sińirgen qaıratkeri Nurken Óteýil somdaıdy. Qoıylymǵa jalpy 65 akter qatysady. Qoıýshy sýretshi – Qanat Maqsutov. Hormeıster – Qazaqstannyń eńbek sińirgen qaıratkeri Amantaı Jumashev.
Sonymen qatar, qyrkúıek aıynda elordanyń tynys-tirshiligine arnalǵan «01» komedııasynyń premerasy usynylmaq. Jańa qoıylymdy sahnalaý úshin aktrısa, rejısser, Almaty qalasyndaǵy ARTıShOK táýelsiz tájirıbelik teatryn qurýshylardyń biri ári kórkemdik jetekshisi Galına Pıanova shaqyrylǵan. Al, qazanda Q. Jetpisbaevtyń «Bala mergen» ertegisiniń premerasy ótedi.
29 qyrkúıek pen 2 qazan aralyǵynda Qallekı teatry Abaı oblysynyń ortalyǵy Semeı qalasynda gastroldik saparmen bolady.
18-23 qazan aralyǵynda teatrda kórnekti teatr jáne kıno aktrısasy, Qazaq KSR Memlekettik syılyǵynyń laýreaty, KSRO jáne QazaqKSR halyq ártisi Sholpan Isabekqyzy Jandarbekovanyń 100 jyldyǵyna arnalǵan XXVIIІ respýblıkalyq teatr festıvali ótedi. Festıval aıasynda Qazaqstannyń Halyq artısi Qadyr Jetpisbaevtyń 80 jyldyǵyna arnalǵan is-sharalar da josparlanǵan. Óner ujymy festıvalde H. Altaı, H. Oraltaıdyń «Altaıdan aýǵan el» (rej: F. Moldaǵalı) qoıylymyn usynady.
Teatr repertýaryndaǵy áıgili rejısser, Halyq Qaharmany Á. Mámbetov sahnalaǵan «Ǵasyrdan da uzaq kún» (2003 j.) dramasy qazan aıynda Á. Mámbetovtyń 90 jyldyǵyna arnalǵan «TEATRALL» ІІ halyqaralyq teatr festıvali aıasynda arnaıy kórsetilip, festıval shymyldyǵyn túredi. Bul – Á. Mámbetovtyń elimizde osy kúnge deıin sahnalanyp, saqtalyp kele jatqan jalǵyz qoıylymy. Al, festıval sarapshylarynyń nazaryna bıyl sahnalanǵan Ǵ. Músirepovtiń «Baıan Sulý - Qozy Kórpesh» (rej: G. Balpeıisova) mýzykalyq dramasy usynylady.
Sonymen qatar, shyǵarmashylyq ujym M. Servantestiń «Don Kıhot» qoıylymymen (rej: Á. Ómirbekuly) Almaty qalasynda ótetin XVII Ortalyq Azııa teatr festıvaline qatysady.
