Qallekı teatrynyń sahnasynda «Shıe» komedııasynyń premerasy ótedi
ASTANA. QazAqparat - Q. Qýanyshbaev atyndaǵy memlekettik akademııalyq qazaq mýzykalyq drama teatry kórermen nazaryna kezekti jańa premerasyn usynady. Sáýir aıynyń 18-19 kúnderi saǵat 19.00-de belgili orys dramatýrgi Anton Chehovtyń «Shıe baǵy» pesasynyń negizinde «ShIE» komedııasynyń premerasyn ótkizedi, dep habarlaıdy teatrdyń aqparat ortalyǵy.
Spektakldiń rejısseri - ıAkýtııadan arnaıy shaqyrtylǵan tanymal teatr jáne kıno rejısseri, ıAkýtııanyń eńbek sińirgen óner qaıratkeri, Reseıdiń ulttyq teatrlarynyń arasynda ótetin «Zolotaıa maska» syılyǵynyń ıegeri Sergeı Potapov.
Ǵasyrlar túıiskende adam balasynyń basyna túsetin qusa-sherdi, rýhanı baǵdardyń joqtyǵyn sezinýden týar aýyrtpalyqty, óliara shaqta keıipkerlerdi torıtyn jalǵyzdyq keselin Chehov pesasynda ishki ıirimdermen bergen. Rejısser Sergeı Potapov modernıstik baıanmen ómirde maqsatsyz, qorǵanyshsyz, dármensiz sendelgen jandardyń turmys-tirshiligin syrty kúlki bolǵanymen túbinde tunǵan kóz jasy arqyly berýge umtylǵan. Chehovtyń sýretkerlik ulylyǵy, adamsúıgishtigi onyń qaharmandarynyń ýaqyt pen keńistikten tys jasaı beretin shynaıylyǵynda. Osy oraıda, spektakl kórermen qaýymdy selsoq qaldyrmasy anyq.
Sahna tórinde rejısserdiń sheshimi boıynsha L.A. Ranevskaıa beınesin Shıe esimimen teatrdyń jas aktrısasy, «Zolotoı Vıtıaz 2015» Halyqaralyq teatr festıvaliniń altyn dıplom ıegeri Aqmaral Tanabaeva sahnalaıdy. Sondaı-aq, spektakl barysynda búginde kórermenniń ystyq yqylasyna bólenip júrgen teatr artısteri, Qazaqstannyń eńbek sińirgen qaıratkerleri - K. Nurlanov, Q. Qystyqbaev, N. Óteýilov, QR «Daryn» Jastar syılyǵynyń ıegeri S. Qashqabaev, aktrısa A. Aımaǵambet, D. Alımov, Sh. Ordabaev, A. Ibraeva, J. Iskakova óner kórsetedi.
