Qallekı teatry Jeńistiń 70 jyldyǵyna oraı «Tyraýlap ushqan tyrnalar» lırıkalyq dramasyn usynady
Bul týraly Q.Qýanyshbaev atyndaǵy qazaq mýzykalyq drama teatrynyń aqparat ortalyǵy habarlady.
Atalmysh týyndy orys dramatýrgy Valentın Ejovtyń «Bulbuldar túni» shyǵarmasy jelisi boıynsha sahanalanbaq. Qazaq tiline aýdarǵan belgili teatr synshysy, Memlekettik syılyqtyń ıegeri, professor - Áshirbek Syǵaı. Rejısserlyq nusqasyn Qazaqstannyń Halyq artısi, teatr jáne kıno rejısseri Talǵat Temenov jasap, sahna tórinen kórermen nazaryna usynbaq.
Eshkim de, eshnárse de umytylmaq emes! Uly Otan soǵysy... Sodan beri 70 jyl ótse de, ata-babalarymyzdyń jasaǵan erlikteri men keıingi urpaqqa syılaǵan jeńisi kimniń de bolsyn jadynda. Uly Otan soǵysyndaǵy Jeńistiń 70 jyldyq mereıtoıynyń qarsańynda rejısser Talǵat Temenov sahnalap otyrǵan «Tyraýlap ushqan tyrnalar» atty lırıkalyq drama jeńisten keıingi sovet soldattarynyń ómirinen syr shertedi.
Atalmysh qoıylym bas keıipker Pernebek Boranbaev pen nemis qyzy Inganyń arasyndaǵy kezdeısoqtyqtan týyndaǵan mahabbat taqyrybyn kóteredi. Osy aralyqta adamzatqa ortaq qasıet - mahabbat pen jaýyzdyq, adamgershilik pen syılastyq, óshpendilik pen súıispenshilik, saǵynysh pen meıirimdiliktiń ushqynyn spektakl barysynan kóresizder.
Qoıylymdaǵy basty keıipker Pernebek Boranbaevti otandyq kıno ónerinde birneshe basty rólderdi somdap júrgen jas akter - Ábilmansur Serikov sahnalasa, nemis qyzy Inganyń rólinde teatrdyń jas aktrısasy - Aqmaral Tanabaeva. Sondaı-aq, spektakl barysynan búginde kórermenniń ystyq yqylasyna bólenip júrgen teatr artısteri, Qazaqstannyń Halyq artısi T. Meıramov, Qazaqstannyń eńbek sińirgen qaıratkerleri - A. Omarov, N. Óteýilov, QR «Daryn» jastar syılyǵynyń ıegeri S. Qashqabaev pen Q. Qystyqbaevtar óner kórsetedi.
Spektakldi naýryz aıynyń 29 juldyzynda da tamashalaı alasyzdar.
