Qallekı teatry VIII Halyqaralyq «Gostınyı dvor» festıvaline qatysady
ASTANA. QazAqparat - Astana qalasynyń Q.Qýanyshbaev atyndaǵy Memlekettik akademııalyq qazaq mýzykalyq drama teatry osy jyldyń 27 mamyr men 2 maýsym aralyǵynda Reseı Federatsııasynyń Orynbor qalasynda ótetin VIII Halyqaralyq «Gostınyı dvor» teatr festıvaline elimizdiń atynan qatysyp, festıval qonaqtary men qala turǵyndaryna óner kórsetpek. Bul týraly teatrdyń aqparat ortalyǵy habaralady.
«Gostınyı dvor» halyqaralyq teatr festıvali alǵash ret 1994 jyly Orynbor qalasynda uıymdastyrylǵan. Búginde atalmysh óner merekesi RF-nyń Mádenıet mınıstrliginiń, RF-nyń teatr odaǵy ókilderiniń bastamasymen júzege asyp keledi. Festıvalge Qazaqstannan bólek Ázirbaıjan teatry, Qyrym-tatar Memlekettik akademııalyq mýzykalyq drama teatry (Sımferopol, Qyrym Respýblıkasy), Bashqurtstan Respýblıkasynyń Memlekettik akademııalyq orys drama teatry (Ýfa), Máskeýdiń jasóspirimder teatry, Reseıdiń jastar teatry (Máskeý) qatysady.
Festıvalge Qallekı teatry orys dramatýrgi Valentın Ejovtyń «Tyraýlap ushqan tyrnalar» lırıkalyq dramasymen qatysady. Qoıylymnyń rejısseri, Qazaqstannyń Halyq artisi, professor - Talǵat Temenov. Atalmysh qoıylym bas keıipker Pernebek Boranbaev pen nemis qyzy Inganyń arasyndaǵy kezdeısoqtyqtan týyndaǵan mahabbat taqyrybyn kóteredi. Osy aralyqta adamzatqa ortaq qasıet - mahabbat pen jaýyzdyq, adamgershilik pen syılastyq, óshpendilik pen súıispenshilik, saǵynysh pen meıirimdiliktiń ushqynyn spektakl barysynan baıqaýǵa bolady.
Qoıylymdaǵy basty keıipker Pernebek Boranbaevty otandyq kıno ónerinde birneshe basty rólderdi somdap júrgen jas akter - Ábilmansur Serikov sahnalasa, nemis qyzy Inganyń rólinde teatrdyń jas aktrısasy - Aqmaral Tanabaeva. Sondaı-aq, spektakl barysynda teatrdyń jas artısterimen qosa Qazaqstannyń Halyq artisi - Tilektes Meıramov, Qazaqstannyń Eńbek sińirgen qaıratkerleri - Aqysh Omarov, Núrken Óteýilov, Qýandyq Qystyqbaev, QR «Daryn» Jastar syılyǵynyń ıegeri Syrym Qashqabaev óner kórsetedi.
