«Qallekı» teatry «Qunanbaı» spektakliniń premerasyn usynady

NUR-SULTAN. QazAqparat - 29, 30, 31 naýryzda Q.Qýanyshbaev atyndaǵy memlekettik akademııalyq qazaq mýzykalyq-drama teatry «Qunanbaı» spektakliniń premerasyn usynady, dep habarlaıdy QazAqparat mádenıet jáne sport mınıstrligine silteme jasap.

«Abylaı han, Zere, Abaı syndy dara tulǵalarmen erekshelenetin teatr repertýarynyń qorjyny Qunanbaı beınesimen tolyǵady. QR Táýelsizdiginiń jáne «Qallekı» teatrynyń 30 jyldyǵyna oraı sahnalanǵan «Qunanbaı» dramasynyń qoıýshy rejısseri – Qazaqstannyń eńbek sińirgen qaıratkeri Bolat Uzaqov. Týyndy avtory – Talasbek Ásemqulov. Qoıýshy sýretshisi – Qanat Maqsutov. Qunanbaı beınesin sahnada úsh quramda - Qazaqstannyń Halyq artısi Tilektes Meıramov, Qazaqstannyń eńbek sińirgen qaıratkeri Erlan Malaev, akter Nartaı Saýdanbekuly somdaıdy», delingen habarlamada.

Spektakl premerasyna oraı, 29 naýryz kúni saǵat 17.30-da buqaralyq aqparat ókilderine arnalǵan baspasóz konferentsııasy ótedi. Oǵan teatr dırektory Ernar Jumataev, teatrdyń kórkemdik jetekshisi Qýandyq Qystyqbaı, rejısser Bolat Uzaqov qatysady.

29 naýryzda saǵat 19.00-de teatr sahnasynda spektakl kórsetilimi bastalady.