Qallekı teatry qarashada «Qarash-qarashtyń» premerasyn ótkizedi
ASTANA. QazAqparat - Q.Qýanyshbaev atyndaǵy memlekettik akademııalyq qazaq mýzykalyq drama teatry qarashanyń 4-5 kúnderi «Qarash-qarash» atty áleýmettik dramanyń premerasyn ótkizedi. Bul týraly QazAqparat tilshisine teatrdyń baspasóz hatshysy Ásem Chapaıqyzy habarlady.
«Qazaq halqynyń ár perzentin elin-jerin súıýge tárbıeleıtin drama elorda sahnasynda tuńǵysh ret sahnalanbaq», - deıdi baspasóz hatshy.
Á.Chapaıqyzynyń aıtýynsha, drama avtory - jazýshy, dramatýrg Qalıqan Ysqaq, qoıýshy rejısseri - QR eńbek sińirgen qaıratkeri Álimbek Orazbekov. «Pesany qazaqtyń uly jazýshysy Muhtar Áýezovtiń «Qarash-qarash oqıǵasy» povesi boıynsha Qalıqan Ysqaq sahnalyq nusqasyn jasaǵan. Bul rejısser Álimbek Orazbekovtiń Áýezov álemine tórtinshi ret qadam basýy. Buǵan deıin «Abaı», «Aıman-Sholpan», «Qorǵansyzdyń kúni» pesalaryn dúnıege ákelip, olar búgingi tańǵa deıin kórermenniń súıikti qoıylymdaryna aınalǵan bolatyn. Elin-jurtyn oılap, kún keshken eki azamattyń dostyǵy, týǵan jerge degen úlken mahabbaty, ar aldyndaǵy adaldyǵy kórinis tabady.
«Jarasbaı oıdyń adamy, Baqtyǵul istiń adamy. Osy eki uǵym birin-biri túsinýde sál jansaqtyq jiberse, «satqyndyq» deıtin jaý tutqıyldan shabýyl jasaıdy. Búginge deıin kúrdeli taqyryp - «jer» máselesi - qoıylymnyń kúretamyry. Ata-babadan qalǵan dalany saqtap qalý - ár qazaqtyń adamı paryzy», - dedi dramanyń mazmunyna toqtalǵan Á.Chapaıqyzy.
Qoıylym keshki saǵat 18.30-da bastalady.
