«Qallekı» teatry festıvalge barady
ASTANA. 13 qyrkúıek. QazAqparat - 13 -24 qyrkúıek aralyǵynda Oral qalasynda qazaq óneriniń has tulǵasy, rejısser, halyq qaharmany - Á.Mámbetovtiń 80 jyldyǵyna arnalǵan Qazaqstan drama teatrlarynyń XX respýblıkalyq festıvali ótedi.
Osy mádenı is-sharaǵa elordanyń Q.Qýanyshbaev atyndaǵy Memlekettik akademııalyq qazaq mýzykalyq drama teatry da qatysyp, óz ónerlerin ortaǵa salmaq.
Atalmysh festıvalge Qallekı teatry - Ǵ.Músirepovtiń «Aqan seri - Aqtoqty» tragedııasymen qatysyp baq synamaq. Qoıýshy rejısseri - Nurlan Jumanııazov.
Festıvaldiń shymyldyǵyn Qallekı sahnasynda rejısser, qazaq óneriniń has tulǵasy, halyq qaharmany Ázirbaıjan Mádıuly Mámbetovtiń rejısserligimen qoıylǵan «Ǵasyrdan da uzaq kún» dramasy ashady. Qoıylym 2003 jyldan beri teatr sahnasynda qoıylyp keledi.
Bıyl qazaq óneriniń has tulǵasy, rejısser Á.M. Mámbetovtiń 80 jyldyq mereıtoıy, ózi baqılyq bolsa da, Qallekı teatry sahnasynda qoıyp ketken spektaklderi búgingi kúnge deıin kórermen kóz aldynda ǵumyr keship keledi. Uly tulǵanyń eńbekterin urpaǵyna nasıhattaý, umyt qaldyrmaý maqsatynda teatr sahnasynda sýretker shyǵarmashylyǵyndaǵy - dramatýrg M.Áýezovtiń «Qaragóz» tragedııasy men Sh.Aıtmatovtyń «Ǵasyrdan da uzaq kún» dramalary sahnalanyp keledi. Has tulǵanyń mereıtoıynyń qurmetine Q.Qýanyshbaev atyndaǵy Memlekettik akademııalyq qazaq mýzykalyq drama teatry XXII jańa maýysymyn 10 qazan kúni saǵat 16.30 - da Sh.Aıtmatovtyń shyǵarmasy boıynsha, rejısser, Halyq qaharmany Ázirbaıjan Mádıuly Mámbetovtiń rejısserligimen qoıylǵan «Ǵasyrdan da uzaq kún» dramasymen ashylady.
Aldaǵy jańa maýsym aldynda teatr ujymy - Almaty, Qostanaı qalalarynda ótetin respýblıkalyq jáne halyqaralyq festıvalderge qatysýdy josparlap otyr. Sol sııaqty qazaq teatr ónerin álemge tanytý maqsatynda qarasha aıynda Túrkııa memleketine gastroldik qoıylymmen baryp qaıtpaqshy.
Teatrdyń qalyptasqan dástúri boıynsha jańa maýsym qarsańynda Qallekı teatrynyń akterlary men aktrısalary - JOO, kolledjder men mektepterdegi kórermenderimen kóptegen kezdesý keshterin bastap ketti.
