Qallekı teatry 36-maýsymyn Áýezovtiń «Qaragóz» tragedııasymen ashty

Teatrdyń qoıýshy rejısseri, Qazaqstannyń eńbek sińirgen qaıratkeri Gúlsına Mırǵalıevanyń aıtýynsha, maýsymnyń dástúrli «Abaı» qoıylymymen emes, «Qaragózben» bastalýy tegin emes.

— Búgin 36-maýsym ashylyp jatyr. Búgin maýsymasharda «Qaragóz» spektaklimen bastap jatyrmyz. Óıtkeni Muhtar Áýezovtiń «Qaragózi» — kórermen jaqsy kóretin klassıka. Bizder ulttyq teatr bolǵan soń, osy spektaklmen ashqanymyz durys dep sheshtik, — dedi Gúlsına Mırǵalıeva.

Bul bastamany teatr dırektory Erbol Qabylbekov ta qoldap, repertýarǵa engizilgen ózgeristiń sebebin túsindirdi.

— Jalpy teatrdyń dástúrine aınalǵan «Abaı» qoıylymymen ashylyp, sonymen jabylyp kelgen edik. Endi zaman ózgerip jatyr, teatrdyń da repertýarynda kishkene ózgerister bolsyn degen maqsatpen, «Abaı» da, «Qaragóz» de Muhtar Áýezovtiń shyǵarmasy bolǵandyqtan, Áýezovten attap ketpeı, «Qaragózben» ashylyp, ózgeshelik jasaýdy uıǵardyq, — dedi ol.

Sondaı-aq Erbol Qabylbekov aldaǵy qarasha aıynda ótetin mańyzdy mereıtoılarǵa toqtaldy. Teatr basshylyǵy bul jyldyń Táýelsizdikpen qurdas óner ujymy úshin jaýapty kezeń ekenin atap ótti.

— Qarashanyń 15-inde teatrymyzǵa 35 jyl bolady. Sonymen birge halyq artısi Gúljan Aspetovanyń 80 jyldyǵyn toılaımyz. Odan bólek rejısser Juldyzbek Jumanbaıdyń «Eńlik-Kebek» spektakli sahnamyzda jaryq kóredi. Soǵan úlken daıyndyqtar júrip jatyr, — dep tolyqtyrdy Gúlsına Mırgalıeva.

Kúzgi maýsymnyń negizgi oqıǵalary:

• Respýblıkalyq festıvalder: Qyrkúıekte Maǵjan Jumabaevtyń «Sholpannyń kúnási» dramasy (rej. G. Mırgalıeva) Pavlodardaǵy «Ertis-Baıan» festıvaline qatysady. Qazan aıynda Lev Tolstoıdyń «Anna Karenına. Roman paraqtary» horeodramasy (rej. R. Mahataev) «TeatrALL» halyqaralyq festıvalinde baq synaıdy.
• Gastroldik saparlar: Oljas Janaıdarovtyń «Jut» dramasy (rej. A. Abýshahmanov) Arqalyq qalasy, Jangeldın jáne Amangeldi aýyldarynyń kórermenderine usynylady.

36-maýsym aıasynda kishi jáne úlken zaldarda repertýarlyq spektakldermen qatar zamanaýı dramatýrgııa týyndylary úzdiksiz qoıylmaq.

Aıta keteıik, buǵan deıin, «Astana Opera» XIV teatr maýsymyn áıgili «Abaı» operasymen ashqanyn jazǵan edik.