Kallas NATO men EO arasynda iritki baryn joqqa shyǵardy
ASTANA. KAZINFORM – Eýropalyq odaqtyń syrtqy saıasat jónindegi joǵarǵy ókili Kaıa Kallas NATO-dan bólek derbes eýropalyq armııa qurý asa qaýipti ekenin málimdep, mundaı qadam daǵdarys jaǵdaıynda basqarý tizbeginiń úzilýine ákelýi múmkin ekenin eskertti, dep jazady Euronews.
EO-nyń qorǵanys áleýeti jónindegi pikirtalastar aıasynda Kallas dúısenbi kúni Norvegııada ótken qaýipsizdik jónindegi konferentsııada jalpy eýropalyq armııa qurý ıdeıasyn synǵa aldy. Onyń aıtýynsha, kez kelgen áskerı daǵdarys kezinde basty basymdyq – aıqyn ári naqty komandalyq qurylymdy saqtaý.
– Eger siz qazirdiń ózinde NATO quramynda bolsańyz, onda ózińizde bar armııadan bólek, taǵy bir armııa qura almaısyz. Óıtkeni daǵdarys sátinde eń mańyzdysy – baǵynyshtylyq tártibi, ıaǵnı kimniń kimge buıryq beretini. Eger eýropalyq jáne NATO-lyq eki bólek armııa bolsa, jaýapkershilik «eki ortada qalyp», bul óte qaýipti jaǵdaıǵa ákeledi. Sondyqtan men Eýropanyń qorǵanysyn nyǵaıtýymyz kerek deımin, biraq ol NATO-nyń bir bóligi bolýy tıis. Ol NATO-ny tolyqtyrady, – dedi ol.
Sońǵy aptalarda NATO ishinde Donald Tramptyń eýropalyq odaqtastarǵa qatysty synı málimdemeleri men Danııanyń jartylaı avtonomdy aýmaǵy – Grenlandııany anneksııalaý týraly qoqan-loqqylaryna baılanysty jańa shıelenis baıqaldy. NATO-nyń bas hatshysy Mark Rıýtte jýyrda EO zań shyǵarýshylaryna Eýropa AQSh qoldaýynsyz ózin qorǵaı almaıtynyn málimdegen bolatyn.
Kallas alıans ishinde jik bar degen pikirlerdi joqqa shyǵaryp, NATO men EO arasyndaǵy yntymaqtastyq, kerisinshe, nyǵaıa túskenin aıtty.
– Bizdiń aramyzda iritki bar degenmen kelispeımin, – dedi ol. – Biz múshe elderimizge qorǵanys shyǵyndaryn arttyrýǵa kómektesýge tyrysyp jatyrmyz jáne Norvegııa sııaqty ózge memlekettermen birge daıyn bolý úshin birlesip áreket etýdemiz. Eýropalyq odaqtyń 23 múshesi bir mezgilde NATO quramynda. Biz alıanspen yntymaqtasamyz jáne shyn máninde birge jumys istep jatyrmyz.
Rıýtteniń «Eýropa ázirge AQSh-syz ózin qorǵaı almaıdy» degen pikirimen kelisesiz be degen suraqqa Kallas bul baǵytta áli de jumys isteý qajet ekenin moıyndady.
– Qazir biz qaýipsizdik máselelerinde de barynsha táýelsiz bolýǵa umtylyp otyrmyz, óıtkeni álsiz tustarymyz anyq kórinip tur. Sondyqtan biz qorǵanysqa kóbirek ınvestıtsııa salý, áleýetti arttyrý jáne ony tek ulttyq deńgeıde emes, eýropalyq deńgeıde qarastyrý baǵytynda jumys istep jatyrmyz, – dedi ol.
Aıta keteıik, AQSh Kongresi «NATO birligin qorǵaý» týraly zań jobasyn daıyndady.