Qalqansha bezi qaterli isigine áıelder jıi shaldyǵady – onkolog

ALMATY. KAZINFORM — Zertteýler kórsetkendeı, áıelder er adamdarǵa qaraǵanda qalqansha bezi qaterli isigine  jıi shaldyǵady. Bul týraly Almaty onkologııalyq ortalyǵynyń onkolog dárigeri Gúlbaný Naqysbek aıtty.

Dárigerdiń aıtýynsha, qalqansha bezi qaterli isigi – endokrındik qaterli isiktiń eń kóp taraǵan túriniń biri.

«Erlerge qaraǵanda áıelderdiń qalqansha bezi qaterli isigine shaldyǵý qaýpi joǵary. Bul gormonaldy ózgeristermen túsindiriledi. Estrogen men progesteron sııaqty áıel jynystyq gormondarynyń deńgeıi qalqansha beziniń ósýi men jumysyna áser etýi múmkin», - Gúlbaný Naqysbek.

Sonymen qatar, ol júktilik, kontratseptıvter jáne gormondyq terapııa sııaqty gormonaldy preparattardy qoldaný qalqansha bezi qaterli isiginiń damý qaýpin arttyrýy múmkin ekenin jetkizdi.

Qalqansha bezinde túıin ne isiktiń paıda bolýy, moıynnyń isinýi, jutynýdyń qıyndaýy, daýystyń ózgerýi nemese qarlyǵý, moıyn aımaǵyndaǵy aýyrsyný nemese jaısyzdyq, tábet pen salmaqtyń jıi ne ádetten tys ózgerýi qalqansha bezi qaterli isiginiń negizgi belgileri.

«Keıbir belgiler aýrýdyń bastapqy kezeńinde baıqalmaıtynyn eskerý mańyzdy. Sondyqtan kez kelgen kúdikti belgi paıda bolǵanda júıeli tekserýden ótip, dárigerge kóringen durys. Esińizde bolsyn, aýrýdy erte anyqtaý jáne adekvatty emdeý saýyǵyp ketý jáne naýqastyń boljamyn jaqsartý múmkindigin aıtarlyqtaı arttyrýy múmkin», - dep túıindedi dáriger.