Qalyń qar men kóktaıǵaq: Abaı oblysynda jol qozǵalysyna shekteý qoıyldy
ASTANA. KAZINFORM — Abaı oblysynda aýa raıynyń nasharlaýyna baılanysty respýblıkalyq joldar ýaqytsha jabyldy, dep habarlaıdy oblystyq PD baspasóz qyzmeti.
— 17 sáýir kúni saǵat 09:00–den bastap aýa raıynyń kúrt nasharlaýyna (qalyń qar, kóktaıǵaq) baılanysty jol qyzmetteriniń arnaıy tehnıkasynan basqa barlyq kólik túrleri úshin keıbir respýblıkalyq mańyzy bar avtomobıl joldarynda qozǵalysqa ýaqytsha shekteý engizildi, — delingen habarlamada.
Shekteýler kelesi ýchaskelerde qoldanylady:
- KAZ07 «QHR shekarasy — Maıqapshaǵaı — Zaısan aınalma joly arqyly — Qalbataý — Semeı — Pavlodar — RF shekarasy (Ýrlıýtóbe beketi)» avtojoly
km 756–906 ýchaskesi (Semeı qalasynan Qalbataý aýylyna deıin)
km 910–1002 ýchaskesi (Qalbataý aýylynan Kókpekti aýylyna deıin)
- KAZ08 «Almaty — Taldyqorǵan — Óskemen — Shemonaıha — RF shekarasy» avtojoly
km 778–967 ýchaskesi (Aıagóz qalasynan Qalbataý aýylyna deıin)
km 971–1013 ýchaskesi (Qalbataý aýylynan Shyǵys Qazaqstan oblysynyń shekarasyna deıin)
- KAZ21 «Óskemen — Semeı» avtojoly
km 103–198 ýchaskesi (Shyǵys Qazaqstan oblysynyń shekarasynan Semeı qalasyna deıin)
— Shekteýler jol qozǵalysy qaýipsizdigin qamtamasyz etý jáne tótenshe jaǵdaılardyń aldyn alý maqsatynda engizildi. Júrgizýshilerden aýa raıy turaqtalǵanǵa deıin atalǵan baǵyttarǵa barýdan bas tartýdy, sondaı-aq ýákiletti organdardyń aqparattaryn qadaǵalap otyrýdy suraımyz. Qozǵalys qaıta ashylǵany týraly qosymsha habarlanatyn bolady, — dep eskertti tártip saqshylary.
Osydan buryn Óskemende kóktemgi jyly aýa raıynan keıin jaǵdaı kúrt ózgerip, qalany qalyń qar basqanyn jazdyq.
