Kalıfornııadaǵy órt: Paradaıs qalasy janyp ketti
LOS-ANDJELES. QazAqparat - Kalıfornııada orman órtinen qaza tapqandar sany 25 adamǵa jetti. 250 myń adam óz úıin tastaýǵa májbúr boldy, dep habarlaıdy QazAqparat VVS-ǵa silteme jasap.
Qazirgi tańda Kalıfornııada úsh iri órtti sóndire almaı jatyr. Olardyń biri - Soltústik Kalıfornııada. Ol shtat tarıhyndaǵy eń iri órt bolyp otyr. Jergilikti bıliktiń deregi boıynsha, jalyn 42 myń gektardy sharpyǵan. Qaza tapqan 25 adamnyń ishindegi 23-iniń ómirin osy órt qıyp ketti. Tilsiz jaý Paradaıs qalasyn tolyqtaı jaıpaǵan.
Ońtústik Kalıfornııada taǵy eki órt bolyp jatyr. Ol Los-Andjeles aýdany men Ventýra okrýgin de sharpyǵan. Bir túnniń ishinde onyń aýmaǵy 28 myń gektarǵa deıin ósken, al ekinshisi 1,8 myń gektardy quraǵan. Órt Tynyq muhıtyna qaraı jyljyp barady, saldarynan jaǵalaýdaǵy aýdandarǵa, tanymal kalıfornııalyq kýrort Malıbýǵa qaýip tónip otyr.
Shtatta tótenshe jaǵdaı jarııalandy. Órt sóndirýshilerdiń boljamy boıynsha, onyń taralýyn tolyqtaı baqylaýǵa alý úshin úsh apta ýaqyt qajet.
Shtattyń soltústiginde, Sakramento mańynda da órt tutandy. Onyń saldarynan Paradaıs qalasynda bes adam qaza tapty - olar óz kólikterinde kóz jumdy.
26 myń adam tirshilik keship jatqan Paradaıs qalasy turǵyndarynyń basym bóligi evakýatsııalandy.
