Kalıfornııadaǵy joıqyn daýyl sońy sý tasqynyna ulasty
ASTANA. KAZINFORM — «Atmosferalyq ózen» dep atalatyn tabıǵı qubylystan týyndaǵan kúshti daýyl Kalıfornııa shtatyna soǵyp, kenetten bolǵan sý tasqyndaryna jáne turǵyndardy jappaı evakýatsııalaýǵa sebep boldy. Bul týraly Sky News agenttigi habarlady.
Sınoptıkterdiń boljamynsha, qolaısyz aýa raıy jaǵdaılary Rojdestvo merekesi ótkenshe saqtalmaq.
Mereke qarsańynda quıyp jaýǵan nóser jańbyr saldarynan Ońtústik Kalıfornııanyń birqatar aýdanyn sý basty. Keı eldi mekenderde júzdegen adam úıin tastap ketýge májbúr boldy. Taýly aımaqtardaǵy demalys oryndarynda sý, laı jáne qoqys qaldyqtary úı mańyndaǵy aýmaqtar men verandalardy basyp qaldy.
AQSh-tyń Ulttyq meteorologııalyq qyzmeti sırek kezdesetin «atmosferalyq ózen» qubylysymen baılanysty «adam ómirine qaýipti atmosferalyq jaǵdaılardyń» saqtalatyny jóninde eskertý jasady. Sondaı-aq shamadan tys jaýyn-shashyn túsý qaýpi joǵary ekeni týraly eskertý áli kúshinde.
Kalıfornııa gýbernatory Gevın Nıýsom shtattyń alty okrýginde tótenshe jaǵdaı rejımin jarııalady. Onyń aıtýynsha, bul halyqty jáne ınfraqurylymdy qorǵaý úshin shuǵyl qyzmetter men qosymsha resýrstardy jedel jumyldyrýǵa múmkindik beredi.
Los-Andjeles okrýginde bılik qaýip-qateri joǵary aımaqtarda ornalasqan úılerge qatysty shamamen 130 evakýatsııalaý jóninde ókim shyǵardy. Bul aýdandardyń kópshiligi jyl basynda bolǵan orman órtinen buǵan deıin de zardap shekken.
Ulttyq meteorologııalyq qyzmettiń meteorology Maık Voffordtyń aıtýynsha, ádette bul kezeńde Ońtústik Kalıfornııada 2,5 santımetrge deıin jaýyn-shashyn túsedi. Alaıda osy aptada keıbir aýdandarda 10–20 santımetr jańbyr jaýýy múmkin, al taýly óńirlerde jaýyn-shashyn kólemi budan da kóp bolady dep kútilip otyr.
Qysqy daýyl ótkennen keıin jaýyn-shashynnyń birshama álsireýine qaramastan, sınoptıkter Rojdestvo kúnderi nóser jańbyr men naızaǵaı ákelýi múmkin jańa daýyl júıesiniń jaqyndap kele jatqanyn eskertti. Bılik ókilderi sondaı-aq kóshkinder men sel júrý qaýpin de joqqa shyǵarmaıdy.
Aldyn ala málimetterge sáıkes, Kalıfornııada keminde eki adamnyń qaza tabýy ekstremaldy aýa raıy jaǵdaılarymen baılanysty bolýy múmkin.
Eske sala keteıik, buǵan deıin Bolıvııada nóser jańbyr saldarynan bolǵan sý tasqyndarynyń nátıjesinde 20 adam qaza tapqan edi.