Kalıfornııadaǵy orman órti 650 gektar aýmaqty sharpydy
ASTANA. KAZINFORM — Kalıfornııanyń Los-Andjeles okrýginde tutanǵan «Sammıt» orman órti bir táýlik ishinde shamamen 650 gektar aýmaqqa taralyp, bılik birneshe aýdan turǵyndaryn evakýatsııalaýǵa májbúr boldy, dep habarlaıdy Kazinform agenttigi TASS-qa silteme jasap.
10 shildede bastalǵan «Sammıt» orman órti qazirgi ýaqytta shamamen 650 gektar jerdi sharpyǵan. Kalıfornııanyń órtke qarsy qyzmetiniń málimetinshe, jalynnyń shyǵý sebebi ázirshe anyqtalǵan joq.
Órttiń tez taralýyna baılanysty bılik birneshe aýdannyń turǵyndaryn shuǵyl evakýatsııalady. Qazirgi ýaqytta qaza tapqandar men zardap shekkender týraly resmı aqparat jarııalanǵan joq. Degenmen Fox News telearnasynyń jergilikti bólimshesi oqıǵa kýágerlerine silteme jasap, jalynnyń birqatar ǵımaratqa da jetkenin habarlady.
Aıta keteıik, 2025 jyldyń basynda Los-Andjeleste tarıhtaǵy eń joıqyn orman órtteriniń biri boldy. Sol kezde «Iton» men «Palıseıds» órtteri 12 myńnan astam ǵımaratty, onyń ishinde tanymal tulǵalardyń turǵyn úılerin de kúlge aınaldyrǵan edi. Resmı derekke qaraǵanda, tilsiz jaýdan 30-ǵa jýyq adam qaza tapty. Al órttiń saldarynan densaýlyǵy nasharlap, keıin kóz jumǵandardy qosa eseptegende, qurbandar sany shamamen 440 adam bolǵan.
Eske salaıyq, buǵan deıin Ispanııadaǵy orman órtinen 12 adam qaza tapqanyn jazǵanbyz.
