Kalıfornııadaǵy lańkestik áreketten bir adam qaza tapty

ASTANA. KAZINFORM — Kalıfornııa shtatyndaǵy Palm-Sprıngs qalasynda bolǵan jarylys FTB tarapynan adamdardyń ólimine ákelgen terrorıstik áreket retinde qarastyrylyp jatyr, dep habarlaıdy NBC News. 

Bıliktiń málimetinshe, senbi kúngi shabýyldyń maqsaty American Reproductive Centers emhanasy boldy, onyń turaǵynda kólik jarylǵan. 

Shabýyl saldarynan bir adam qaza taýyp, taǵy tórt adam jaraqat aldy. Jarylystan 250 ıard (shamamen 230 metr) radıýsta birneshe ǵımarat pen kásiporynǵa zaqym keldi. 

Kúdikti qaza tapty. Onyń Týentınaın-Palms qalasynyń 25 jastaǵy turǵyny Gaıa Edvard Bartkýs ekeni anyqtaldy. Ol jarylǵysh zatty 2010 jyly shyǵarylǵan kúmis tústi Ford Fusion kóliginde iske qosqan.

FTR Kalıfornııadaǵy reprodýktıvti densaýlyq emhanasyndaǵy jarylysty antınatalıstik ıdeologııamen (eshkimde bala bolmaýy kerek, al bala týý ǵalamshardaǵy azaptyń mólsherin arttyrady — red.) baılanystyryp otyr.

Shabýyldyń bul nusqasy kúdiktiniń áleýmettik jelilerdegi habarlamalaryn, sonyń ishinde antınatalıstik kózqarasty qoldaıtyn 30 mınýttyq aýdıojazbany zerttegennen keıin paıda boldy.

Bılik kúdiktiniń shabýyldy tikeleı translıatsııalaýǵa árekettengenin jáne olar «manıfest» dep ataıtyn nárseni tergep jatqanyn málimdedi. 

Buǵan deıin Las-Vegas sportzalynda atys bolyp, eki adam kóz jumǵanyn habarlaǵan bolatynbyz.