Kalıfornııadaǵy baılarǵa salynatyn salyq mıllıarderlerdiń shtattan ketýine sebep bolýy múmkin
ASTANA. KAZINFORM – Kremnıı alqabynyń birqatar tehnologııalyq mıllıarderi Kalıfornııada usynylyp otyrǵan baılyqqa salynatyn 5 paıyzdyq salyqtyń engizilýine qarsy shyǵyp, bul bastama qabyldanǵan jaǵdaıda shtattan ketýi múmkin ekenin málimdedi. Bul týraly Fox Business habarlaıdy.
Málimetke sáıkes, Qyzmet kórsetý salasy qyzmetkerleriniń halyqaralyq kásipodaǵy men Batys óńirdegi densaýlyq saqtaý qyzmetkerleriniń birlestigi Kalıfornııa turǵyndarynyń aktıvteri 1 mlrd AQSh dollarynan asqan jaǵdaıda, birjolǵy 5 paıyzdyq salyq engizý jónindegi usynysty qoldaǵan. Bastamany qoldaýshylar bul qarjy federaldyq deńgeıde qysqaryp jatqan densaýlyq saqtaý shyǵyndarynyń ornyn toltyrýǵa kómektesýi múmkin ekenin alǵa tartady.
Alaıda bul shara ázirge shtat boıynsha daýys berýge shyǵarylý satysynda turǵanymen, Kremnıı alqabynyń eń tanymal ókilderiniń birqatary atalǵan salyq kompanııa negizin qalaýshylar men iri kapıtaldyń syrtqa ketýine ákelýi múmkin ekenin eskertip otyr.
Qorǵanys tehnologııalary salasyndaǵy Anduril startapynyń teń quryltaıshysy Palmer Lakı bul salyqty tóleý úshin ózi sekildi kompanııa negizin qalaýshylarǵa bıznestegi iri úlesterin satýǵa týra keletinin aıtty. Ol bastamany «alaıaqtyq, ysyrap jáne bul usynysty alǵa tartyp otyrǵan uıymdarǵa jasalǵan saıası qyzmet» dep atady.
– Men alǵashqy kompanııamnan tabys taýyp, júzdegen mıllıon dollar salyq tóledim. Qalǵan qarajatqa alty myń adam jumys isteıtin ekinshi kompanııany qurdym. Endi maǵan jáne áriptesterime mıllıardtaǵan dollardy qolma-qol tabýdyń jolyn izdeýge týra keledi, – dep jazdy Palmer Lakı X áleýmettik jelisinde.
Eger bul shara jalpyulttyq daýys berýge shyǵarylyp, saılaýshylar tarapynan qoldaý tapsa, salyq 2026 jylǵy 1 qańtardaǵy jaǵdaı boıynsha Kalıfornııada turǵan barlyq rezıdentke qatysty qoldanylady. Máselen, aktıvteri 20 mlrd dollardy quraıtyn turǵyn birjolǵy 1 mlrd dollar salyq tóleýi tıis bolady.
Investor-mıllıarder Bıll Akman Kalıfornııa mundaı sheshim qabyldanǵan jaǵdaıda «ózin-ózi joıý jolyna túsedi» dep baǵalady.
Buǵan deıin amerıkalyq ánshi Beıonse resmı túrde mıllıarder atanǵany týraly habarlanǵan bolatyn.
