Kalıfornııadaǵy balalar merekesinde bolǵan atystan tórt adam qaza tapty

ASTANA. KAZINFORM – AQSh-tyń Kalıfornııa shtatyna qarasty Stokton qalasynda atys bolyp, tórt adam qaza taýyp, taǵy on adam jaralandy, dep habarlaıdy VVS.

Qala vıtse-meri Djeıson Lıdiń aıtýynsha, oqıǵa balalardyń týǵan kúnine arnalǵan mereke kezinde bolǵan.

VVS taratqan málimetke sáıkes, shabýyl jasaǵan adamnyń jeke basy ázirge anyqtalǵan joq. Sondaı-aq jergilikti bılik oqıǵaǵa qatysty qosymsha aqparat bermeı otyr.

CBS telearnasy jergilikti bılikke silteme jasap habarlaǵandaı, senbi kúni keshkisin Kalıfornııanyń soltústigindegi Stokton qalasynda ótken otbasylyq jıynda onnan asa adam oqqa ushty. 

«14 jábirlenýshiniń tórteýi qaza tapqany sherıf keńsesi tarapynan rastaldy», – dep jazdy jýrnalıster.

Sherıf ókili Hızer Brenttiń aıtýynsha, qaza tapqandardyń arasynda balalar da, eresekter de bar. Aldyn ala derekter bul oqıǵanyń maqsatty túrde jasalǵanyn kórsetedi.

Buǵan deıin AQSh-taǵy taǵy bir oqıǵa týraly habarlanǵan edi: Aq úı mańynda AQSh Ulttyq gvardııasynyń áskerı qyzmetkerlerine oq atylǵan. Keıinirek Batys Vırdjınııa gýbernatory jaralanǵan eki ulttyq gvardııa qyzmetkeriniń alǵan jaraqattarynan kóz jumǵanyn málimdedi.

Keıin AQSh prezıdenti Donald Tramp bul shabýyldy terror aktisi dep atap, árbir sheteldikti qaıta tekserýge ýáde berdi.