Kalıfornııada jylqylar 1 dollardan satylatyn boldy
SAN-HOSE. QazAqparat - Qazan aıynyń ishinde AQSh-tyń Soltústik Kalıfornııa shtatynda 1000-ǵa jýyq jabaıy jylqy bir jerge aıdalyp ákelinbek. Keıin olar satylymǵa shyǵarylyp nemese senimdi adamdarǵa beriledi. Sonymen birge, jergilikti sheneýnikter janýarlardyń qasaphanaǵa da jiberilýi múmkin ekenin joqqa shyǵarmaıdy, dep habarlaıdy QazAqparat mnn.com-ǵa silteme jasap.
Jabaıy jylqylar Oregon shtatynyń shekarasyna jaqyn ornalasqan Modok ulttyq parkiniń ústirtin mekendeıdi. Kalıfornııadaǵy jabaıy jylqylardyń úıiri AQSh Federaldyq orman basqarmasynyń baqylaýynda bolyp otyr. Jylqylardy aıdap áketý 9 qazanda bastalyp, bir aıǵa sozylady.
Aıdalǵan 1000 janýardyń 700-ge jýyǵy býaz bıeler nemese 10 jastan aspaǵan maldar. Olar arnaıy mekemege aıdalatyn bolady. 10 jyldan asqan janýarlar ýaqytsha ustaý pýnktine jiberiledi. Olardyń bireýiniń baǵasy 125 AQSh dollary bolmaq. Bul baǵa 30 kún ózgermeıdi, budan keıin 1 jylqynyń baǵasy 1 dollarǵa deıin túsedi.
Jabaıy jylqylar qasaphanalardan bólek rancho nemese basqa da jerlerge jiberilýi múmkin.
Federaldyq sheneýnikter jabaıy jylqylar mekendeıtin aýmaq olar úshin tar bolyp jatqanyn aıtýda.
«Bizdiń aýmaǵymyzda 206-dan 402-ge deıin janýar bolýy tıis, al bizde bolsa, 4000-ǵa jýyq jylqy jaıylyp júr», - dedi Modok ulttyq parkiniń bas ǵylymı jetekshisi Amanda MakAdams. Onyń aıtýynsha, janýarlarǵa azyq pen sý jetispeıdi.
Federaldyq sheneýnikter jylqylardyń neǵurlym kóp sanyn jaıǵastyrǵysy keletinin aıtty. Biraq Federaldyq orman basqarmasynyń ókili Ken Sendýskı úkimettiń «olardyń bárin jaıǵastyra almaıtynyn» aıtýda.
Jabaıy jylqylardy qorǵaý boıynsha amerıkandyq naýqan ókilderi Federaldyq orman sharýashylyǵyna qalyptasqan jaǵdaıda gýmanıstik sheshim qabyldap, barlyq isti birtindep atqarýǵa shaqyrdy. Biraq Úkimettiń kózqarasy boıynsha, osyndaı sharalar jaǵdaıdy ózgerte almaıdy.
«Jabaıy jylqylar popýlıatsııasynyń 20-25 paıyzǵa ósýi kezinde bul jerde tek bıylǵy jyly 800-1000 jabaıy jylqy qulyndaǵan, sondyqtan birtindep jasalǵan qadamdar nátıjesiz», - dep málim etti jergilikti bılik ókilderi.
