Kalıfornııada taǵy da alapat órt tutanyp, 50 myńnan asa adam evakýatsııalandy

ASTANA. KAZINFORM — Los-Anjeles okrýginiń soltústigindegi órt Kastaık qalasynyń mańyndaǵy 10 200-den astam orman alqabyn (4 128 ga) sharpydy, 50 myńnan asa adamdy evakýatsııalaýǵa týra keldi, dep jazady CBS News.

«Hıýza» dep atalatyn jańa órt bir saǵat ishinde 500 akrǵa (202 gektar) deıin ulǵaıyp ketken jáne eki saǵat ishinde 3,407 akr (1,378 ga) jer qyzyl jalynǵa orandy, dep habarlaıdy Kalıfornııa orman sharýashylyǵy jáne órtten qorǵaý departamenti.

Órt sóndirýshilerdiń aıtýynsha, órtengen ǵımarat tirkelmedi, biraq qatty jel saldarynan órttiń turǵyn úılerge taralý qaýpi joǵary. Órt sóndirýge 4 myńǵa jýyq órt sóndirýshi jumyldyryldy.

Los-Anjeles okrýginiń sherıfi Robert Lýna 31 myń adamdy evakýatsııalaýǵa buıryq berilgenin aıtty jáne taǵy 23 myń adamǵa qaýip tónip turǵanyn eskertti.

Kartada orman órtiniń aımaqtary kórsetilgen: joǵarǵy jaǵynda Kastaık qalasy, tómengi jaǵynda Tynyq muhıty aımaǵy, al oń jaǵynda Los-Anjelestiń soltústigi ornalasqan.

Buǵan deıin Kalıfornııa shtatynda 200 myńǵa jýyq adamǵa qaýip tónip turǵany habarlanǵan bolatyn. Los-Anjeleste 7 qańtarda bastalǵan alapat órt 27 adamnyń ómirin qıdy.

AQSh-tyń burynǵy prezıdenti Djo Baıden Kalıfornııadaǵy osy jaǵdaıdy shtat tarıhyndaǵy eń iri jáne eń joıqyn órt dep atady.

AQSh-taǵy órt shyǵynyn saqtandyrý jaba ala ma — Kazinform agenttiginiń menshikti tilshisi mán-jaıdy baıyptap kórgen edi.