Kalıfornııada tabıǵı órt saldarynan myńdaǵan adam evakýatsııalandy
ASTANA. QazAqparat - Kalıfornııanyń myńdaǵan turǵyny shattyń birneshe aımaǵynda úsh kúnnen beri órship turǵan iri órt saldarynan qaýipsiz jerlerge kóshirildi, dep habarlaıdy «QazAqparat» HAA Associated Press agenttigine silteme jasap.
Agenttik málimetteri boıynsha, Sakramento qalasynan shamamen 100 km qashyqtyqta ornalasqan Serra-Nevada taý bókteriniń aýmaǵynda 4 myńnan astam adam qaýipsiz aımaqtarǵa kóshirildi, taǵy 7,4 myń turǵyn óz úılerin tastap ketýge daıyn kúıde.
Kalıfornııanyń orman sharýashylyǵy departamenti ókiliniń aıtýynsha, tilsiz jaý 20 sharshy shaqyrym aýmaqta laýlap jatyr, kem degende 10 úı otqa orandy.
Onymen bir mezgilde, Santa-Barbaradan shyǵysqa qaraı ornalasqan dalaly alqaptan 3,6 myńǵa jýyq adam kóshirildi. Olardyń arasynda júzdegen demalýshylar da bar. Órt qursaýynda qalyp qoıǵan jergilikti balalar lageriniń 90 tárbıelenýshisi men 50 tálimgeri din-aman evakýatsııalandy.
