Kalıfornııada oıyn-saýyq keshinde ajal qushqandar sany 24-ke jetti
ASTANA. QazAqparat - AQSh-tyń Kalıfornııa shtatynda qoımada ótip jatqan mýzykalyq oıyn-saýyq keshi barysynda tutanǵan órttiń saldarynan qaza bolǵandar sany 24-ke jetti, dep habarlaıdy QazAqparat TASS agenttigine silteme jasap.
Oklend okrýgi sherıf basqarmasynyń ókili Alameda Reı Kellı jeksenbi kúni ótken baspasóz máslıhatynda:«Biz 24 adamnyń denelerin taptyq», - deı otyryp, bul san artatynyn meńzedi. Onyń aıtýynsha, órt sóndirýshiler qoıma ǵımaratynda izdestirý jumystaryn jalǵastyrýda. Jalynnyń shyǵý sebebi áli anyqtalǵan joq.
Jeksenbi kúni NBC arnasy qaza bolǵan 10 adam týraly habarlaǵan bolatyn. Al jergilikti bılik qaıǵyly oqıǵadan 9 adam mert bolyp, 25-ten astamy iz-túzsiz joǵalǵandyǵyn aıtty. Alameda Reı Kellı qurbandardyń sany artatynyn eskertken bolatyn. «Biz qaza bolǵan adamdardyń 30-dan 40-qa deıingi sanyn boljap otyrmyz», - dedi ol.
Eske salaıyq, órt jergilikti ýaqyt boıynsha senbige qaraǵan túni Oklendtiń 31-inshi avenıýynda túngi klýbtyń qoıma ǵımaratynda oryn aldy. Polıtsııanyń esebinshe, oqıǵa kezinde ǵımaratta 50-den 100 adamǵa deıin bolǵan. Onda oryndaýshy Golden Donna-nyń kontserti ótip jatqan. Oklendttiń órt sóndirýshileriniń jumysy týraly aıtyp otyratyn beıresmı tvıtter-akkaýntta jazylǵandaı, jalyn shatyr arqyly ishke ene bastaǵanda qutqarýshy komandalar ǵımarattan dereý shyǵarylǵan. Okrýg sherıfiniń baǵalaýynsha, bul 1989 jyly bolǵan jer silkinisinen keıingi adam ólimi boıynsha eń iri oqıǵa. Ol kezde 63 adam kóz jumyp, 3700-den astamy zardap shekken bolatyn.
