Kalıfornııada muǵalimderge qarý ustaýǵa ruqsat etildi
ASTANA. QazAqparat - AQSh-ta jańa oqý jyly bastalysymen, Kalıfornııa shtatynda jańa ereje engizildi: muǵalimder jáne basqa da mektep qyzmetkerleri ózderimen qarý alyp júre alady. Ol úshin oq qarýyn jasyryn alyp júrýge lıtsenzııasy bolý kerek, dep jazdy Life.ru.
Jańa erejege sáıkes, Kalıfornııanyń keıbir orta mektepterinde muǵalimder men basqa da mektep qyzmetkerleri qarýmen júrýi múmkin. Bilim berý mekemesinde jalpy sany bes adam qarý ustaýyna bolady. Olar ózderimen birge oq qarýyn jasyryn alyp júrýge lıtsenzııasy bolý kerek jáne aldyn ala qarýdy qoldaný týraly kýrstan ótedi.
Oqıǵa ornyna polıtsııa jetkenshe, oq qarýyn paıdalanýǵa muǵalimderdiń tolyq quqyǵy bar.
Tótenshe jaǵdaılardy qarýdyń kómegimen sheshetin bilim ordalarynyń biri - "Kıngsberg haı skýl" orta mektebi.
- Osylaısha, biz óz oqýshylarymyzdy, qyzmetkerlerimizdi jáne barlyq mektep qaýymyn qorǵaı alamyz, - dedi qarý ustaýǵa tolyq quqyǵy bar mektep qyzmetkerleriniń biri.
"Kıngsberg haı skýl" mektebiniń dırektory Rıchard Shoel de óz qyzmetkerleriniń qarý ustaýyn qoldaıdy.
- Eger osy is arqyly kópshilik ózin qaýipsiz sezinse, bul ıdeıany qoldaımyn. Máselen, aıaqasty atys-shabys bastalyp ketse, qyzmetkerlerdiń biri ony toqtata alady, - dedi Shoel.
Alaıda, jasyryn qarý alyp júrgen muǵalimder oqýshylardy qıyn sátte qutqara almaıdy, tájirıbeli qylmyskerge muǵalimniń shamasy jetpeıdi dep oılaıtyndar bar.
- Eger adam qarý ustap kórmegen bolsa, ony dereý atady jáne sol qylmysker muǵalimniń qarýyn tartyp alýy múmkin, - dep málimdedi Kıngsberg mektebiniń túlekteriniń biri.
