Kalıfornııada qarly borannan júzdegen myń úı jaryqsyz qaldy

SAKRAMENTO. QazAqparat – AQSh-tyń Kalıfornııa shtatynda sırek bolatyn qysqy daýyldan osy demalys kúnderi elektr jelileri úzilip, tasjoldar men jaǵajaılar jabyldy, dep habarlaıdy QazAqparat BBC News-ke silteme jasap.

Qolaısyz kún raıy saldarynan 120 myńnan astam adam birneshe kún boıy elektr qýatynan qol úzip qaldy. Shtattyń batys jaǵalaýyndaǵy negizgi soltústik-ońtústik tasjoldyń «Júzim sabaǵy» dep atalatyn taýly aımaqtaǵy ýchaskesi jabyldy.

Osy aptada basylýy tıis bolǵan daýyl – Kalıfornııadaǵy eń kúshti daýyldardyń biri. Tolassyz soqqan jel aǵashtardy qulatyp, elektr jelilerin zaqymdady.

Jergilikti bıliktiń habarlaýynsha, senbi kúni Los-Andjeles okrýginde naızaǵaı jarqyldaýyna baılanysty barlyq jaǵajaılar birneshe saǵatqa jabylǵan.

Ulttyq meteorologııalyq qyzmeti Kalıfornııanyń ońtústiginde qatty jańbyr men naızaǵaı, sondaı-aq Soltústik taýaralyq aımaq pen Soltústik Kalıfornııada qar jaýýy múmkin dep boljady.

Shtat astanasy Sakramento turǵyndaryna jeksenbiden sársenbige deıin saıahattaýdan bas tartý týraly eskertildi.

Daýyldan qaza tapqandar men zardap shekkender týraly ázirge aqparat túspegen.