Kalıfornııada qar kóshkini saldarynan segiz adam qaza tapty

ASTANA. KAZINFORM — Kalıfornııa shtatyndaǵy Taho kóli mańynda qar kóshkini júrgennen keıin qutqarýshylar joǵalyp ketken segiz shańǵyshynyń máıitin tapty, dep habarlaıdy Associated Press agenttigi.

Nevada okrýginiń sherıfi Shennan Mýn taǵy bir adamdy izdeý jumystary jalǵasyp jatqanyn málimdedi. Jalpy qar kóshkininen keıin 15 adam qar qursaýynda qalǵan. Olardyń altaýy qutqaryldy.

Associated Press agenttiginiń málimetinshe, bul oqıǵa 1981 jyldan bergi AQSh-taǵy eń iri adam shyǵynyna ákelgen jaǵdaı bolyp otyr. Sol jyly Vashıngton shtatynda 11 alpınıst qaza tapqan eken.

Oqıǵa 17 aqpanda Trakı qalasyna jaqyn ornalasqan Kasl-Pık aýdanynda bolǵan. Qar kóshkini trassa syrtynda júrgen shańǵyshylar tobyn basyp qalǵan.

Alty adam qar astynan tiri shyǵaryldy. Zardap shekkender túrli deńgeıde jaraqat alǵan, olardyń ekeýi arnaıy medıtsınalyq kómek kórsetý úshin emdeý mekemesine jetkizildi.

Qutqarýshylardyń aıtýynsha, aman qalǵandar ýaqytsha panalaý ornyna jasyrynǵan, ol ishinara brezentten jasalǵan. Іzdeý qyzmetterimen radıomaıaktar men mátindik habarlamalar arqyly baılanysyp otyrǵan, bul qutqarý jumystaryn jedeldetýge múmkindik bergen.

Jergilikti bılik izdeý jumystarynyń aýa raıynyń qolaısyzdyǵy, qar jamylǵysynyń turaqsyzdyǵy jáne qaıtalama kóshkin qaýpine baılanysty kúrdelene túskenin atap ótti.

Eske salaıyq, elimizdiń Tótenshe jaǵdaılar mınıstrligi aldaǵy kúnderi taýlarda qar kóshkini júrýi múmkin ekenin eskertti. TJM kóshkin qaýpi jarııalanǵan kezeńde taýly aımaqtarǵa barýdan bas tartýǵa, taýǵa shyǵar aldynda aýa raıy boljamymen tanysýǵa jáne baǵytty aldyn ala josparlaýǵa, daıyndalmaǵan jerlerde júrýden jáne syrǵanaýdan aýlaq bolýǵa, belgilengen soqpaqtarmen qozǵalýǵa keńes beredi.

Buǵan deıin Almatynyń kóshkin qaýpi bar ýchaskelerinde blokbeketter qoıylatyny habarlanǵan.