Kalıfornııada bombalaýshy ushaq apatqa ushyrap, segiz adam qaza tapty
ASTANA. KAZINFORM — AQSh armııasynyń B-52 Stratofortress strategııalyq bombalaýshy ushaǵy Kalıfornııa shtatyndaǵy Mohave shólinde ornalasqan Edvards áskerı-áýe bazasynan ushyp shyqqannan keıin kóp uzamaı apatqa ushyrady, dep habarlaıdy NBC.
Oqıǵa jergilikti ýaqyt boıynsha saǵat 11:20–da bolǵan. Ushaq josparly synaq ushýyn oryndap jatqan. Kýágerlerdiń aıtýynsha, apattan keıin aspanǵa qoıý qara tútin kóterilgen.
— Búgin Edvards áskerı-áýe bazasynda orny tolmas qaıǵyly oqıǵa boldy. Biz segiz otandasymyzdan aıyryldyq, — dedi jýrnalısterge polkovnık Djeıms Heız.
Onyń aıtýynsha, qaza tapqandardyń qatarynda áskerı qyzmetshi jáne memlekettik qyzmetshiler men merdigerler bolǵan.
Polkovnıktiń málimetinshe, B-52 ushaǵy bazanyń radıolokatsııalyq júıelerin jańǵyrtý baǵdarlamasyna qatysqan. Ol jerden kóterilgennen keıin birden órtenip ketken.
Ázirshe apattyń naqty sebebi anyqtalmaǵan. Djeıms Heızdiń sózinshe, arnaıy tergeý sharalary aıaqtalǵannan keıin ǵana oqıǵanyń sebebi belgili bolady. Tergeý jumystary 30 kúnge sozylýy múmkin. Al qosymsha zertteý sharalary alty aıdan astam ýaqytty alýy múmkin.
Boeing B-52 Stratofortress-ti amerıka áskeri 1950 jyldardan beri paıdalanylyp keledi. Bul — úlken qashyqtyqtaǵy strategııalyq bombalaýshy ushaq. Ol AQSh pen Izraıldiń Iranǵa qarsy sońǵy soǵysynda bombalaýǵa qoldanylǵan.
15 shaqyrymǵa deıingi bıiktikte usha alatyn bul iri bombalaýshy ushaq (kommertsııalyq áýe laınerleri shamamen 10 shaqyrym bıiktikte ushady) shamamen 35 tonna júk kótere alady. Oǵan bir jolda júzdegen qarapaıym bomba men 32 ıadrolyq qanatty zymyran sııady.
Oǵan áýede janarmaı quıýǵa bolady, bul onyń alys qashyqtyqqa erkin jetýine múmkindik beredi. Sol qasıetiniń arqasynda AQSh-qa qyrǵı-qabaq soǵys kezeńinde «ıadrolyq qolshatyr» qurýǵa múmkindik berdi.
Buǵan deıin Úndistanda áskerı ushaq apatqa ushyrap, bes adam qaza tapqan bolatyn.
Nazerke Jumabek
