Kalıfornııada bes qyz tirideı mashınada janyp ketti
ASTANA. 6 mamyr. QazAqparat - Kalıfornııada San-Frantsısko shyǵanaǵynyń ústimen ótetin San-Mateo kópirinde bes qyz qaza boldy, taǵy tórteýi túrli dárejedegi kúıik jaraqattaryn aldy.
Bul týraly CNN amerıkalyq telearnasy habarlady.
Mamyrdyń 4-inen 5-ine qaraǵan túni kópirmen ótip bara jatqan, ishinde toǵyz qyz ben júrgizýshi bolǵan «Lınkoln» markaly uzyn aq lımýzın kenettan jalyndaı bastady. Qyzdardyń tórteýi jáne júrgizýshi kólikten shyǵa aldy, qalǵandary janyp ketti.
Aldyn ala aqparatqa sáıkes, mert bolǵandardyń barlyǵy 30 jasqa tolmaǵan. Órttiń shyǵýyna ne sebep bolǵanyn qazir saraptama anyqtaýda. Belgilisi, jalyn avtokóliktiń artqy bóliginen shyqqan.
