Kalıfornııada belgisiz bireý tórt adamdy pyshaqtap, taǵy ekeýin jaraqattady
LOS-ANDJELES-NUR-SULTAN. QazAqparat – Sársenbi kúni keshke Kalıfornııa shtatynda bolǵan qantógistiń saldarynan tórt adam kóz jumdy, taǵy ekeýi jaralandy, dep habarlaıdy QazAqparat USA Today-ge silteme jasap.
Polıtsııa Los-Andjelestiń ońtústik-shyǵysynda ornalasqan kórshiles Garden-Groýv jáne Santa-Ana qalalarynda eki saǵattyń ishinde birneshe adamǵa shabýyl jasady degen kúdikpen 33 jastaǵy er adamdy tutqyndady.
Garden-Groýv qalashyǵy polıtsııasynyń málimetinshe, kúdikti adamdardy tonamaq bolyp bas salǵan. Polıtsııa qaskóıdi Santa-Ana qalasynda ustady. Munda ol dúkenniń kúzetshisin óltirgen. Kalıfornııa shtatynyń bıligi kúdiktiniń izine onyń sur tústi «Mersedes» kóliginiń júrgen jerin anyqtaý arqyly túsip, dúken janyndaǵy turaqtan tapqan.
Polıtsııa qyzmetkerleri er adamnyń óte ashýly bolǵanyn jáne kóp adamǵa shabýyl jasaǵanyn aıtty.
Polıtsııaǵa eń alǵashqy qońyraý páterden túsken. Onda ury túsip, bir adam jaralanǵany habarlanǵan. Kúdikti páter tonaǵan turǵyn úıde taǵy eki adamdy óltirgen. Ekeýiniń biri balkonnan pyshaqtalǵan kúıinde tabylsa, ekinshisi aýrýhanada kóz jumdy.
Alaıda kúdikti munymen toqtap qalmaǵan. Ol toqash satatyn dúkendi, chekti qolma-qol aqshaǵa aınaldyratyn kompanııany, saqtandyrý kompanııasyn tonap, bankte áıel adamǵa birneshe ret pyshaq suqqan.
Sondaı-aq, qylmysker janarmaı quıý stansasynda er adamdy bas salyp, murnyn kesip ala jazdaǵan. Janarmaı quıý beketiniń mańyndaǵy meıramhananyń qyzmetkeri de kúdiktiniń taǵy bir qurbanyna aınaldy.
Polıtsııa barlyq zardap shekkender men kúdikti latynamerıkalyq azamattar ekenin rastady.
