Kalıfornııa AQSh quramynan bólinip shyqpaqshy

ASTANA. KAZINFORM – Kalıfornııa bıligi shtattyń AQSh quramynan shyǵýy máselesi boıynsha daýys berý týraly petıtsııaǵa qol jınaýǵa arnalǵan «Calexit» naýqanyn maquldady, dep habarlaıdy Kazinform menshikti tilshisi. 

Kalıfornııa shtatynyń memlekettik hatshysy Shırlı Veberdiń málimetinshe, bastama shilde aıynyń sońyna qaraı 546 651 qol jınaýy tıis, dep habarlaıdy CBS News. 

Shtat Kalıfornııanyń 2027 jyly táýelsiz el retinde ómirsheńdigin zerttep, kelesi jyly esepti jarııalaý úshin 20 músheden turatyn memlekettik komıssııa qurýy kerek.

Memlekettik hatshy kezdeısoq tańdaıtyn komıssııa músheleri belgili bir talaptarǵa saı bolýy kerek. Mysaly, tirkelgen 100 saılaýshy usynǵan jáne Kalıfornııada keminde bes jyl turýy kerek.

Bul shara 2028 jylǵy qarashadaǵy saılaý bıýlletenine kelesi suraqty shyǵarady: «Kalıfornııa Qurama Shtattardan bólinip, erkin jáne táýelsiz el bolýy tıis pe?»

Daýys berý maquldansa, bul «Amerıka Qurama Shtattaryna senimsizdik votýmyn» bildiredi. Maquldaý úshin saılaýshylardyń keminde 50% qatysýy jáne 55%-nyń «ıá» degen daýysy qajet.

Memleket bul sharaǵa jańa komıssııany saılaý jáne qurý úshin 10 mln dollar jumsaıdy, sondaı-aq komıssııanyń jyldyq shyǵyndary 2 mln dollar bolady.

San-Dıego okrýginde ornalasqan Kalıfornııa táýelsiz ınstıtýty shtat táýelsiz bola alady dep sanaıdy, dep atap ótti Calmatters. 

Instıtýt shtat turǵyndarynyń 60 paıyzdan astamy «Kalıfornııa aldaǵy 10 jyl ishinde AQSh-tan beıbit túrde bólinip ketse, jaqsyraq bolar edi» degen pikirmen kelisken jańa saýalnamany jarııalady.

Kalıfornııanyń halqy 40 mln adamnan az, bul Kanada halqymen derlik birdeı, biraq ekonomıkasynda úlken aıyrmashylyq bar. Kanadanyń 2,3 trln dollarlyq ekonomıkasy álemde 9-shy orynda, al Kalıfornııanyń 3,9 trln dollarlyq ekonomıkasy 5-shi nemese 6-shy orynda tur.

Buǵan deıin jańadan saılanǵan prezıdent Tramp ımmıgratsııalyq saıasattyń kúsheıetinin jáne zańsyz ımmıgranttardy «kelgen jerlerine» deportatsııalaýdy bastaıtynyn jetkizdi.