Qalıbek Qýanyshbaev atyndaǵy drama teatrynda jańa maýsym ashyldy
ASTANA. KAZINFORM — Q. Qýanyshbaev atyndaǵy memlekettik akademııalyq qazaq mýzykalyq drama teatrynyń jańa maýsymy «Abaı» spektaklimen ashyldy.
11 qyrkúıekte Qalıbek Qýanyshbaev atyndaǵy Qazaq ulttyq mýzykalyq drama teatrynyń 34-shi maýsymy bastaldy. Jańa maýsym shymyldyǵy dástúrli túrde M.Áýezovtiń «Abaı» qoıylymymen ashyldy.
Abaıdyń ǵasyrlar boıy qalyptasqan kertartpa ádet-ǵuryptar men ádiletsizdikke qarsy kúresi, onyń tereń oılary men fılosofııasy sahnada aıqyn kórinis tapty. Akterlerdiń sheber oıyny kórermenderdi erekshe áserge bóledi.
Aǵa Abaı rólin somdaǵan Tilektes Maıramov pen jas Abaıdy beınelegen Nurken Óteýildiń sheberligi kópshiliktiń erekshe yqylasyna ıe boldy. Qoıylym aıaqtalǵannan keıin de akterlerge uzaq ýaqyt qoshemet kórsetip, olardyń eńbegin joǵary baǵalady.
Qoıylymnyń rejısseri — Qazaqstannyń eńbek sińirgen qaıratkeri Á.Orazbekov, hormeısteri — Qazaqstannyń eńbek sińirgen qaıratkeri A.Jumashev, qoıýshy sýretshi — Q.Maqsutov.
Aıta keteıik, qyrkúıek aıynyń repertýarynda teatr M.Áýezovtiń «Abaı», «Qaragóz», «Aıman-Sholpan», G.Nızamıdiń «Láıli-Májnún», D. Ramazannyń «Joshy han», S. Turǵynbekulynyń «Shámshi» jáne taǵy basqa spektaklderdi usynady.
Sonymen qatar, halyq aspaptar ansambli men sımfonııalyq orkestrdiń kontsertteri de kórermen nazaryna usynylady.
Sonymen qatar, «Qaragóz» tragedııasy Aqtaýda ótetin ІІІ Halyqaralyq «Ábish álemi» teatr festıvaline, «Voıtsek» dramasy Pavlodarda ótetin «Ertis-Baıan» І respýblıkalyq teatrlar festıvaline qatysady.
Jańa maýsymnyń basty jańalyqtarynyń biri — qazan aıynda «Fıgaronyń úılenýi» spektakliniń premerasy ótse, jeltoqsan aıynda «Parasat maıdany» qoıylymy kópshilikke usynylady.
